اسرائیل سے گٹھ جوڑ ناقابلِ معافی، ملوث عناصر سے حساب لیا جائے گا: ایرانی وزیر خارجہ

(تہران) ایرانی وزیر خارجہ عباس عراقچی نے کہا ہے کہ اسرائیل کے ساتھ گٹھ جوڑ کرنے والوں سے حساب لیا جائے گا اور ایرانی عوام کے خلاف کسی بھی سازش کو برداشت نہیں کیا جائے گا۔

سماجی رابطے کی ویب سائٹ ایکس پر جاری اپنے بیان میں عباس عراقچی نے کہا کہ ایران کے عظیم عوام سے دشمنی ایک احمقانہ جوا ہے، جبکہ ایرانی عوام کے خلاف اسرائیل کے ساتھ تعاون ناقابلِ معافی عمل ہے۔

ایرانی وزیر خارجہ نے کہا کہ جو عناصر اسرائیل کے ساتھ مل کر ایران کے خلاف سرگرم ہیں، انہیں اپنے اقدامات کا جواب دینا ہوگا۔

انہوں نے اپنے بیان میں مزید کہا کہ اسرائیلی وزیراعظم نیتن یاہو کی جانب سے حالیہ انکشافات سے متعلق ایرانی سکیورٹی ادارے پہلے ہی ملکی قیادت کو آگاہ کر چکے تھے۔

عباس عراقچی کے بیان کو خطے میں بڑھتی کشیدگی اور ایران اسرائیل تعلقات کے تناظر میں اہم قرار دیا جا رہا ہے، جہاں دونوں ممالک کے درمیان الزامات اور سفارتی بیانات میں شدت دیکھنے میں آ رہی ہے۔