جنگ بند ہوتی نظر نہیں آ رہی، پاکستان کے پاس تیل کے سٹریٹیجک ذخائر موجود نہیں: وزیر پیٹرولیم

(اسلام آباد) وفاقی وزیر پیٹرولیم علی پرویز ملک نے کہا ہے کہ ایران امریکا جنگ بند ہوتی نظر نہیں آ رہی اور پاکستان کے پاس تیل کے سٹریٹیجک ذخائر موجود نہیں ہیں۔نجی ٹی وی کے پروگرام میں گفتگو کرتے ہوئے علی پرویز ملک نے کہا کہ ملک میں کروڈ آئل کے صرف 5 سے 7 دن کے ذخائر موجود ہوتے ہیں جبکہ پیٹرول کے ایک دن کے بھی سٹریٹیجک ذخائر دستیاب نہیں۔

انہوں نے کہا کہ وزیراعظم شہباز شریف نے عوام کی مشکلات کم کرنے اور پیٹرول کی دستیابی یقینی بنانے کیلئے اقدامات کیے، جبکہ وفاقی حکومت نے سبسڈی دینے کی بھی کوشش کی۔

وزیر پیٹرولیم نے کہا کہ موجودہ علاقائی صورتحال کے پیش نظر ہمیں اپنی تیاری، ذخائر اور انرجی سیکیورٹی کو بہتر بنانا ہوگا۔ ان کے مطابق ڈیزل ملکی معیشت میں کلیدی کردار رکھتا ہے اور اسی لیے اس کی قیمتوں کا منصفانہ تعین ضروری ہے۔

انہوں نے وضاحت کی کہ ڈیزل کی قیمت کے فارمولے میں تبدیلی کسی دباؤ کا نتیجہ نہیں بلکہ ریفائنریز کو اپ گریڈ کرنے اور مکمل ڈی ریگولیشن کی طرف لے جانے کیلئے ضروری اقدام ہے۔

علی پرویز ملک نے کہا کہ وزیراعظم اور سی ڈی ایف کے ساتھ طے کیا گیا ہے کہ کروڈ آئل کیلئے 30 دن کا پروگرام بنایا جائے تاکہ مستقبل میں توانائی کے بحران سے بچا جا سکے۔

انہوں نے مزید کہا کہ پاکستان اس وقت کمرشل ذخائر پر چل رہا ہے، تاہم طویل المدتی انرجی سیکیورٹی کیلئے جامع منصوبہ بندی ناگزیر ہے۔