ایران کی تجاویز احمقانہ، جنگ بندی وینٹی لیٹر پر ہے: ڈونلڈ ٹرمپ

(واشنگٹن ڈی سی ) امریکی صدر ڈونلڈ ٹرمپ نے ایران کی نئی تجاویز کو “احمقانہ” قرار دیتے ہوئے کہا ہے کہ ایران سے جنگ بندی اس وقت “وینٹی لیٹر پر” ہے اور مستقل جنگ بندی کے لیے تہران کی پیشکش قابل قبول نہیں۔

امریکی صدر نے میڈیا سے گفتگو میں کہا کہ ابھی “پراجیکٹ فریڈم” دوبارہ شروع کرنے کا حتمی فیصلہ نہیں کیا گیا، تاہم ایران پر دباؤ برقرار رکھا جائے گا تاکہ اسے جوہری پروگرام پر جھکنے پر مجبور کیا جا سکے۔

ڈونلڈ ٹرمپ کا کہنا تھا کہ ایران جوہری ہتھیار حاصل نہیں کر سکتا اور امریکا کسی بھی ممکنہ معاہدے تک تہران پر سفارتی اور اقتصادی دباؤ جاری رکھے گا۔ انہوں نے دعویٰ کیا کہ ایران کے نام نہاد نمائندوں کا جواب انہیں پسند نہیں آیا اور تہران نے اپنے خط میں جوہری ہتھیار نہ بنانے کی واضح یقین دہانی بھی نہیں کرائی۔

امریکی صدر نے مزید کہا کہ ایران کے پاس ملبے سے جوہری مواد نکالنے کی ٹیکنالوجی موجود نہیں، جبکہ ایران کی ناکہ بندی کو انہوں نے “عظیم فوجی منصوبہ” قرار دیا۔

انہوں نے بتایا کہ چین کے صدر آبنائے ہرمز کے مسئلے کے حل میں کردار ادا کرنا چاہتے ہیں۔ ٹرمپ کے مطابق چینی صدر سے ایران، ائیوان اور روس سے متعلق معاملات پر بھی بات چیت ہوگی، جبکہ تائیوان کو امریکی ہتھیاروں کی فروخت بھی گفتگو کا حصہ ہوگی۔