اسحاق ڈار کا امریکی تحویل میں موجود جہازوں پر پاکستانی عملے کی واپسی کیلئے سفارتی رابطہ

(اسلام آباد) اسحاق ڈار نے سنگاپور کے قریب امریکی تحویل میں موجود جہازوں پر سوار پاکستانی اور ایرانی بحری کارکنوں کی بحفاظت واپسی کیلئے سفارتی رابطے تیز کر دیے ہیں۔

وزیر خارجہ نے ویوین بالاکرشنن سے ٹیلیفونک گفتگو کرتے ہوئے 11 پاکستانی اور 20 ایرانی بحری کارکنوں کی وطن واپسی میں تعاون کی درخواست کی۔ یہ جہاز اس وقت سنگاپور کے قریب سمندری حدود میں موجود ہیں۔

اسحاق ڈار نے سوشل میڈیا پلیٹ فارم ایکس پر جاری بیان میں بتایا کہ انہوں نے عباس عراقچی سے بھی اس معاملے پر بات چیت کی ہے اور دونوں ممالک صورتحال پر قریبی رابطے میں ہیں۔

انہوں نے کہا کہ پاکستان ایرانی شہریوں کی پاکستان کے راستے ایران واپسی کیلئے ہر ممکن سہولت فراہم کرنے کیلئے بھی تیار ہے۔

وزیر خارجہ نے سنگاپور کے تعاون اور حمایت کو سراہتے ہوئے کہا کہ پاکستانی وزارت خارجہ اور متعلقہ ادارے امریکی حکام سمیت تمام متعلقہ فریقین سے مسلسل رابطے میں ہیں تاکہ پاکستانی شہریوں کی جلد اور محفوظ وطن واپسی یقینی بنائی جا سکے۔