ایک نشست میں معاہدے کی توقع نہیں، متعدد نکات پر اتفاق ہوا: ایران

(اسلام آباد) ایرانی وزارت خارجہ کے ترجمان اسماعیل بقائی نے کہا کہ اسلام آباد میں ایران کے وفد کے لیے دن طویل اور مصروف رہا، جہاں پاکستان کی نیک نیتی پر مبنی ثالثی کے تحت سخت اور تفصیلی مذاکرات بغیر کسی تعطل کے جاری رہے۔

انہوں نے کہا کہ مذاکرات کے دوران فریقین کے درمیان متعدد پیغامات اور تحریری مسودوں کا تبادلہ بھی ہوا، جس سے مختلف معاملات پر پیش رفت ممکن ہوئی۔ اسماعیل بقائی کے مطابق ان مذاکرات میں آبنائے ہرمز، جوہری پروگرام، جنگی نقصانات کے ازالے، پابندیوں کے خاتمے اور خطے میں جنگ کے مکمل خاتمے جیسے اہم امور پر بات چیت کی گئی۔

ایرانی ترجمان نے بتایا کہ متعدد نکات پر اتفاق رائے پیدا ہوا تاہم دو سے تین اہم معاملات پر اختلاف برقرار رہنے کے باعث جامع معاہدہ طے نہیں پا سکا۔ انہوں نے واضح کیا کہ اس طرح کے پیچیدہ معاملات میں فوری معاہدے کی توقع حقیقت پسندانہ نہیں ہوتی۔

اسماعیل بقائی کا کہنا تھا کہ مذاکرات کی کامیابی کا دار و مدار امریکا کی سنجیدگی، نیک نیتی اور ایران کے جائز حقوق و مفادات کو تسلیم کرنے پر ہے۔ انہوں نے مزید کہا کہ ایران، پاکستان اور خطے کے دیگر دوست ممالک کے درمیان رابطے اور مشاورت کا سلسلہ جاری رہے گا کیونکہ سفارت کاری کبھی ختم نہیں ہوتی۔

ایرانی ترجمان نے مذاکرات کی میزبانی اور ثالثی میں کردار ادا کرنے پر پاکستان کی حکومت اور عوام کا شکریہ بھی ادا کیا اور امید ظاہر کی کہ سفارتی عمل کے ذریعے مثبت پیش رفت جاری رہے گی۔