جویریہ سعود کو یمنیٰ زیدی کی جعلی بچپن کی تصویر دکھانے پر شدید تنقید

(کراچی) پروگرام میں مشہور شخصیات کی بچپن کی تصاویر دکھا کر پہچاننے کا کھیل کھیلا جا رہا تھا، جس میں مہوش حیات، اقرا عزیز، سجل علی اور عاطف اسلم کی تصاویر شامل تھیں۔ تاہم ایک تصویر کو یمنیٰ زیدی کی بچپن کی تصویر قرار دیا گیا جو بعد میں ایک کم عمر لڑکی فریال حمید کی نکلی۔

بعد ازاں یمنیٰ زیدی نے انسٹاگرام پر وضاحت جاری کرتے ہوئے واضح کیا کہ نشر کی گئی تصویر ان کی نہیں ہے۔ اس معاملے پر سوشل میڈیا پر شدید ردعمل سامنے آیا، جس کے بعد جویریہ سعود نے معذرت کرتے ہوئے کہا کہ ان کی ٹیم نے تصویر سوشل میڈیا سے بغیر تصدیق کے حاصل کی اور نشر کر دی، جس پر انہیں افسوس ہے۔

میڈیا رپورٹس کے مطابق فریال حمید کے والد نے مؤقف اختیار کیا کہ تصویر ان کی اہلیہ کے سوشل میڈیا اکاؤنٹ سے بغیر اجازت لی گئی اور ٹی وی شو میں استعمال کی گئی، جس سے ان کی بیٹی کی شناخت متاثر ہوئی۔ انہوں نے اس معاملے کو سنجیدہ قرار دیتے ہوئے قانونی کارروائی کا عندیہ بھی دیا ہے۔

اس واقعے کے بعد سوشل میڈیا صارفین نے ٹی وی چینلز اور پروڈکشن ٹیموں پر زور دیا ہے کہ کسی بھی تصویر یا مواد کو نشر کرنے سے پہلے تصدیق کو یقینی بنایا جائے۔