جے ڈی وینس کی قیادت میں امریکی وفد اسلام آباد پہنچ گئے تاریخی بات چیت شروع

(اسلام آباد ) ایران اور امریکا کے درمیان ہونے والے تاریخی امن مذاکرات کیلئے امریکی نائب صدر جے ڈی وینس کی سربراہی میں اعلیٰ سطحی امریکی وفد اسلام آباد پہنچ گئے ہے۔

اس اہم سفارتی مشن میں امریکی صدر کے خصوصی ایلچی اسٹیو وٹکوف اور جیرڈ کشنر بھی وفد کا حصہ ہیں جبکہ نیشنل سکیورٹی کونسل، اسٹیٹ ڈیپارٹمنٹ اور امریکی محکمہ دفاع کے اعلیٰ حکام بھی مذاکرات میں شرکت کریں گے۔

وفاقی دارالحکومت پہنچنے پر نائب وزیراعظم و وزیر خارجہ اسحاق ڈار، فیلڈ مارشل سید عاصم منیر اور وفاقی وزیر داخلہ محسن نقوی نے امریکی وفد کا پرتپاک استقبال کیا۔ اس موقع پر دونوں ممالک کے درمیان اہم امور پر ابتدائی تبادلہ خیال بھی کیا گیا۔

امریکی نائب صدر جے ڈی وینس نے میڈیا سے گفتگو کرتے ہوئے کہا کہ وہ تعمیری گفتگو کے خواہاں ہیں اور صدر ڈونلڈ ٹرمپ نے مذاکرات کیلئے واضح ہدایات جاری کی ہیں۔ انہوں نے کہا کہ امریکا خطے میں امن اور استحکام کیلئے سنجیدہ کوششیں کر رہا ہے۔

اسحاق ڈار نے اس موقع پر خطے اور عالمی امن کیلئے امریکی عزم کو سراہتے ہوئے امید ظاہر کی کہ تمام فریقین مذاکرات کو مثبت انداز میں آگے بڑھائیں گے۔

یہ مذاکرات ایسے وقت میں ہو رہے ہیں جب امریکا اور اسرائیل کی جانب سے 28 فروری کو شروع کی گئی ایران کے خلاف جنگ میں دو ہفتوں کا وقفہ جاری ہے۔ پاکستان کی ثالثی میں 8 اپریل کو ہونے والی عارضی جنگ بندی کے بعد خطے میں کشیدگی میں وقتی کمی آئی ہے جبکہ اس تنازع نے مشرق وسطیٰ سمیت عالمی معیشت کو شدید متاثر کیا تھا۔

دوسری جانب ایرانی وفد پہلے ہی اسلام آباد پہنچ چکا ہے۔ ایرانی پارلیمنٹ کے اسپیکر باقر قالیباف نے کہا ہے کہ ایران خیر سگالی کے طور پر مذاکرات کیلئے اسلام آباد آیا ہے لیکن امریکا پر مکمل اعتماد نہیں کیا جا سکتا۔

باقر قالیباف کا کہنا تھا کہ اگر امریکا حقیقی معاہدہ پیش کرے اور ایران کے حقوق کو تسلیم کرے تو ایران مذاکرات کیلئے تیار ہے۔

سفارتی ذرائع کے مطابق اسلام آباد میں ہونے والے یہ مذاکرات خطے میں امن کیلئے انتہائی اہم قرار دیے جا رہے ہیں اور آئندہ چند دنوں میں اہم پیش رفت متوقع ہے۔