ایرانی صدر مسعود پزشکیان کی سپریم لیڈر مجتبیٰ خامنہ ای سے طویل ملاقات

(تہران) ایرانی میڈیا کے مطابق صدر پزشکیان نے کہا کہ یہ ملاقات اعتماد، عاجزی اور گہرے خلوص پر مبنی ماحول میں ہوئی۔ انہوں نے کہا کہ سپریم لیڈر کے اندازِ گفتگو اور مخلصانہ رویے نے انہیں بے حد متاثر کیا۔

صدر پزشکیان کے مطابق آیت اللہ مجتبیٰ خامنہ ای کے طرزِ عمل نے ملاقات کے ماحول کو سکون، ہمدردی اور براہِ راست مکالمے کی فضا میں تبدیل کر دیا۔ انہوں نے بتایا کہ دونوں رہنماؤں کے درمیان تقریباً ڈھائی گھنٹے تک تفصیلی گفتگو جاری رہی۔

ایرانی صدر نے کہا کہ دشمن کا اصل مقصد ایران کی قومی یکجہتی کو نقصان پہنچانا ہے۔ ان کے مطابق بیرونی قوتیں دباؤ اور اقتصادی پابندیوں کے ذریعے عوام میں بے چینی اور غصہ پیدا کرنا چاہتی ہیں تاکہ حکومتی نظام کو کمزور کیا جا سکے۔

انہوں نے مزید کہا کہ امریکا اقتصادی دباؤ بڑھا کر ایرانی عوام کو اشتعال دلانے کی کوشش کر رہا ہے، تاہم ایرانی قوم اتحاد اور استحکام کے ساتھ ان چیلنجز کا مقابلہ کرے گی۔