کراچی میں گرفتار ملزمہ انمول عرف پنکی کے خلاف اسلحہ برآمدگی کا مقدمہ درج

(کراچی) ایف آئی آر کے مطابق گارڈن ویسٹ کے علاقے میں کارروائی کے دوران ملزمہ کے قبضے سے ایک پستول برآمد ہوئی، تاہم وہ اسلحے کا لائسنس پیش نہ کر سکی، جس پر اس کے خلاف الگ مقدمہ درج کیا گیا۔

پولیس کے مطابق ملزمہ کو گارڈن کے ایک رہائشی فلیٹ سے گرفتار کیا گیا تھا۔ واقعے کے بعد فلیٹ کے مالک نے رہائش خالی کرنے کا مطالبہ کردیا۔

دوسری جانب جس فلیٹ کا پتہ مقدمے میں درج کیا گیا، وہاں رہائش پذیر خاندان نے پولیس کی کارروائی پر شدید تحفظات کا اظہار کیا ہے۔ خاندان کا کہنا ہے کہ وہ گزشتہ آٹھ برس سے مذکورہ فلیٹ میں کرائے پر مقیم ہیں اور انمول عرف پنکی نامی کسی خاتون کو نہیں جانتے۔

متاثرہ خاندان نے سوال اٹھایا کہ پولیس نے ان کے گھر کا پتہ ایف آئی آر میں کیسے شامل کیا۔ ان کا کہنا تھا کہ پولیس کی غفلت کے باعث وہ شدید ذہنی اذیت کا شکار ہیں۔

یاد رہے کہ پولیس نے گارڈن کے علاقے میں کارروائی کرتے ہوئے ملزمہ کو گرفتار کیا تھا۔ پولیس کا دعویٰ ہے کہ ملزمہ کے قبضے سے پستول، کروڑوں روپے مالیت کی کوکین، کیمیکلز اور دیگر نشہ آور اشیا برآمد کی گئی تھیں۔

پولیس حکام کے مطابق انمول عرف پنکی انتہائی مطلوب ملزمہ تھی اور 10 مقدمات میں مفرور بھی قرار دی جا چکی تھی۔ تفتیشی حکام کا کہنا ہے کہ ملزمہ شہر میں منشیات کی خرید و فروخت اور سپلائی کے ایک منظم نیٹ ورک کو چلا رہی تھی۔

پولیس کے مطابق ملزمہ آن لائن آرڈرز کے ذریعے منشیات مخصوص رائیڈرز کے ذریعے سپلائی کرتی تھی، جبکہ خواتین رائیڈرز کو بھی استعمال کیا جاتا تھا تاکہ قانون نافذ کرنے والے اداروں سے بچا جا سکے۔