ٹرمپ ایران کے خلاف فوجی کارروائی کی منظوری دے سکتے ہیں، امریکی میڈیا کا دعویٰ

امریکا اور ایران کے درمیان بڑھتی ہوئی کشیدگی کے تناظر میں ایک اہم پیش رفت سامنے آئی ہے، جہاں امریکی میڈیا نے دعویٰ کیا ہے کہ صدر ڈونلڈ ٹرمپ ممکنہ طور پر آئندہ چند دنوں میں ایران کے خلاف فوجی کارروائی کی منظوری دے سکتے ہیں۔

امریکی اخبار وال اسٹریٹ جرنل کی رپورٹ کے مطابق امریکا ایران کے خلاف ممکنہ فوجی آپریشن کی تیاری کر رہا ہے اور امریکی افواج کو جنگی کارروائیوں کے لیے تیار رکھا گیا ہے۔ رپورٹ میں کہا گیا ہے کہ صدر ٹرمپ ایران کے ساتھ تصفیہ کی کوششیں بھی جاری رکھے ہوئے ہیں، تاہم انہوں نے تمام آپشنز کھلے رکھے ہیں۔

ادھر ایرانی میڈیا نے الزام عائد کیا ہے کہ امریکی فوج نے دو سویلین کشتیوں کو نشانہ بنایا، جس کے نتیجے میں پانچ شہری جاں بحق ہو گئے۔ اس واقعے کے بعد خطے میں کشیدگی مزید بڑھنے کا خدشہ ظاہر کیا جا رہا ہے۔

تجزیہ کاروں کے مطابق اگر امریکا کی جانب سے فوجی کارروائی کی منظوری دی جاتی ہے تو اس کے خطے اور عالمی سطح پر گہرے اثرات مرتب ہو سکتے ہیں، اور مشرق وسطیٰ ایک نئی کشیدگی کی لپیٹ میں آ سکتا ہے۔