امریکا میں گرفتار خواتین کا قاسم سلیمانی سے کوئی تعلق نہیں، زینب سلیمانی نے امریکی دعوؤں کو مسترد کر دیا

(تہران) زینب سلیمانی نے امریکی وزارت خارجہ کے مؤقف کو جھوٹ قرار دیتے ہوئے کہا کہ یہ بے بنیاد پروپیگنڈا ہے جس کا مقصد قاسم سلیمانی کی شخصیت اور ایرانی قوم کے خلاف عالمی رائے عامہ ہموار کرنا ہے۔

انہوں نے اپنے بیان میں کہا کہ امریکا اپنے مقاصد کے حصول کے لیے جھوٹے بیانیے گھڑ رہا ہے، جو نہ صرف افسوسناک بلکہ قابل مذمت بھی ہے۔ ان کا کہنا تھا کہ ایسے الزامات کا حقیقت سے کوئی تعلق نہیں اور یہ صرف سیاسی مقاصد کے تحت لگائے جا رہے ہیں۔

واضح رہے کہ امریکی وزیر خارجہ مارکو روبیو نے حالیہ بیان میں دو خواتین کو قاسم سلیمانی کی بھتیجی اور بیٹی قرار دیتے ہوئے ان پر ایران کی حمایت کا الزام عائد کیا تھا۔ امریکی حکام نے ان خواتین کے گرین کارڈ بھی منسوخ کر دیے، جس کے بعد انہیں حراست میں لے لیا گیا۔

امریکی وزیر خارجہ کے مطابق حمیدہ سلیمانی افشار اور ان کی بیٹی امریکا میں گرین کارڈ ہولڈر تھیں اور وہاں پرتعیش زندگی گزار رہی تھیں، تاہم اس معاملے پر زینب سلیمانی نے امریکی مؤقف کو مسترد کرتے ہوئے اسے جھوٹا قرار دیا ہے۔

اس معاملے کے بعد ایران اور امریکا کے درمیان کشیدگی مزید بڑھنے کا امکان ظاہر کیا جا رہا ہے، جبکہ عالمی سطح پر بھی اس معاملے پر ردعمل سامنے آ رہا ہے۔