ٹرانسپورٹرز کا کرایوں میں 65 فیصد تک اضافہ، عوام پر مہنگائی کا نیا بوجھ

(لاہور ) ذرائع کے مطابق ٹرانسپورٹرز نے کرایوں میں 65 فیصد تک اضافہ کیا ہے، جس کے باعث مختلف شہروں کے درمیان سفر کرنے والے مسافروں کو اب ایک ہزار سے ڈھائی ہزار روپے تک اضافی رقم ادا کرنا پڑ رہی ہے۔

نئے کرایوں کے مطابق لاہور سے اسلام آباد کا کرایہ 3000 سے بڑھا کر 4000 روپے کر دیا گیا ہے، جبکہ پشاور کے لیے کرایہ 3500 سے بڑھ کر 4600 روپے ہو گیا ہے۔ اسی طرح سرگودھا اور فیصل آباد کے کرایوں میں بھی نمایاں اضافہ کیا گیا ہے۔

مزید برآں، کراچی اور حیدر آباد جانے والے مسافروں کو بھی بھاری اضافے کا سامنا ہے، جہاں کرایے بالترتیب 12000 اور 13000 روپے تک پہنچ گئے ہیں۔

دیگر شہروں جیسے رحیم یار خان، مری اور ملتان کے کرایوں میں بھی اضافہ کر دیا گیا ہے۔

ٹرانسپورٹرز کا مؤقف ہے کہ پٹرولیم مصنوعات کی قیمتوں میں اضافے اور سپیئر پارٹس کی مہنگائی کے باعث اخراجات میں بے پناہ اضافہ ہو چکا ہے، جس کی وجہ سے کرایوں میں اضافہ ناگزیر ہو گیا ہے۔ ان کا کہنا ہے کہ اگر کرایوں میں اضافہ نہ کیا جائے تو گاڑیاں چلانا ممکن نہیں رہے گا۔

دوسری جانب مسافروں نے اس اچانک اور بڑے اضافے پر شدید تشویش کا اظہار کرتے ہوئے حکومت سے نوٹس لینے کا مطالبہ کیا ہے۔