ٹرمپ نے جنگ بندی منصوبے پر ایران کا جواب مسترد کردیا، کشیدگی میں اضافہ

(واشنگٹن)صدر ٹرمپ نے اپنے سوشل میڈیا پلیٹ فارم “ٹروتھ سوشل” پر جاری بیان میں کہا کہ انہوں نے ایران کے نام نہاد نمائندوں کی جانب سے موصول ہونے والا جواب پڑھ لیا ہے، تاہم یہ جواب انہیں ہرگز پسند نہیں آیا۔

انہوں نے اپنے پیغام میں لکھا، “میں نے ابھی ایران کے نام نہاد نمائندوں کی جانب سے دیا گیا جواب پڑھا ہے، مجھے یہ بالکل پسند نہیں آیا، یہ مکمل طور پر ناقابل قبول ہے، اس معاملے پر توجہ دینے کا شکریہ۔”

صدر ٹرمپ کے اس سخت ردعمل کے بعد خطے میں جاری کشیدگی میں مزید اضافے کا خدشہ ظاہر کیا جا رہا ہے، جبکہ سفارتی حلقے صورتحال پر گہری نظر رکھے ہوئے ہیں۔

دوسری جانب ایرانی میڈیا نے دعویٰ کیا ہے کہ تہران کا جواب پاکستان کے ذریعے امریکہ تک پہنچایا گیا۔ رپورٹس کے مطابق پاکستان نے اس معاملے میں ثالثی کا کردار ادا کیا، تاہم اس حوالے سے پاکستانی حکام کی جانب سے کوئی باضابطہ بیان سامنے نہیں آیا۔

تجزیہ کاروں کے مطابق ایران اور امریکہ کے درمیان جاری تناؤ کے تناظر میں یہ پیش رفت خطے کی سیاسی صورتحال پر اہم اثرات مرتب کر سکتی ہے۔