اسحاق ڈار کی چینی ہم منصب سے ملاقات، پاک-چین کا فوری جنگ بندی کا مطالبہ

ترجمان دفتر خارجہ کے مطابق مشترکہ اعلامیہ میں کہا گیا ہے کہ جنگ سے متاثرہ علاقوں میں انسانی امداد کی فوری اجازت دی جائے اور کشیدگی کے خاتمے کے لیے جلد از جلد مذاکرات شروع کیے جائیں۔

اعلامیہ میں اس بات پر بھی زور دیا گیا کہ ایرانی اور خلیجی ممالک کی خودمختاری اور سلامتی کو یقینی بنایا جائے، جبکہ تمام فریقین طاقت کے استعمال یا اس کی دھمکی سے گریز کریں۔ دونوں ممالک نے جنگ کے دوران غیر فوجی اہداف کے تحفظ اور شہریوں و سول تنصیبات پر حملے بند کرنے کی ضرورت پر بھی زور دیا۔

اعلامیہ میں بجلی کی تنصیبات اور پرامن جوہری ڈھانچے پر حملے روکنے کا مطالبہ کیا گیا، جبکہ آبنائے ہرمز کو توانائی اور تجارت کے لیے اہم بحری راستہ قرار دیتے ہوئے وہاں پھنسے بحری جہازوں اور عملے کے تحفظ کو یقینی بنانے پر زور دیا گیا۔

مزید کہا گیا کہ تجارتی جہازوں کی محفوظ اور فوری گزرگاہ کو ممکن بنا کر بحری آمدورفت بحال کی جائے۔ دونوں ممالک نے اقوام متحدہ کے کردار کو مضبوط بنانے کی حمایت کرتے ہوئے عالمی قوانین اور اقوام متحدہ کے منشور کے تحت امن معاہدوں کی پاسداری پر زور دیا۔