ایرانی بندرگاہوں کی ناکہ بندی جنگ بندی کی خلاف ورزی ہے، عباس عراقچی کا سخت ردعمل

(ایران )اپنے تازہ بیان میں انہوں نے کہا کہ تجارتی جہازوں پر حملے اور عملے کو یرغمال بنانا اس سے بھی بڑی خلاف ورزی ہے۔ ان کا کہنا تھا کہ ایران اپنے قومی مفادات کے دفاع کا مکمل ادراک رکھتا ہے اور ضرورت پڑنے پر مؤثر جواب دینے کی صلاحیت رکھتا ہے۔

دوسری جانب امریکی صدر ڈونلڈ ٹرمپ نے ایران میں مبینہ طور پر قید 8 خواتین کی رہائی کا مطالبہ کیا ہے۔ انہوں نے کہا کہ اگر ایرانی مذاکرات کار ان خواتین کو رہا کریں تو یہ ایک مثبت اور اچھا آغاز ثابت ہو سکتا ہے۔ ٹرمپ نے مزید کہا کہ انہیں یقین ہے کہ رہا ہونے والی خواتین اس اقدام کا احترام کریں گی اور ایران کو چاہیے کہ ان کے ساتھ کسی قسم کا نقصان دہ سلوک نہ کرے۔

ادھر امریکی نائب صدرجی ڈی وینس کا متوقع دورہ پاکستان تاخیر کا شکار ہو گیا ہے۔ امریکی اخبار نیویارک ٹائمز کے مطابق ایران کی جانب سے واضح جواب نہ ملنے کے باعث اس دورے میں تاخیر ہوئی، تاہم امکان ظاہر کیا جا رہا ہے کہ جے ڈی وینس مختصر نوٹس پر پاکستان کا دورہ کر سکتے ہیں۔

خطے میں بڑھتی ہوئی کشیدگی کے دوران ان بیانات نے صورتحال کو مزید حساس بنا دیا ہے، جبکہ عالمی برادری کی نظریں ممکنہ سفارتی پیش رفت پر مرکوز ہیں۔