خیبر پختونخوا سے رواں سال کا آٹھواں پولیو کیس رپورٹ

خیبر پختونخوا کے ضلع خیبر سے رواں سال کا آٹھواں پولیو کیس سامنے آگیا ہے، جس کے بعد ملک میں رواں سال رپورٹ ہونے والے پولیو کیسز کی مجموعی تعداد 8 ہوگئی ہے۔ نیشنل ایمرجنسی آپریشنز سینٹر (این ای او سی) نے نئے کیس کی تصدیق کردی ہے۔

این ای او سی کے مطابق رواں سال اب تک خیبر پختونخوا میں پولیو کے 6 جبکہ سندھ میں 2 کیسز رپورٹ ہوچکے ہیں۔ حکام نے خبردار کیا ہے کہ پولیو ایک لاعلاج مرض ہے، تاہم بروقت ویکسینیشن کے ذریعے بچوں کو اس خطرناک بیماری سے محفوظ بنایا جاسکتا ہے۔

اسی سلسلے میں ملک بھر کے 97 منتخب اضلاع میں انسدادِ پولیو کی ذیلی قومی مہم 2 سے 8 نومبر 2026 تک جاری رہے گی۔ مہم کے دوران پانچ سال سے کم عمر 2 کروڑ 40 لاکھ سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔

نیشنل ایمرجنسی آپریشنز سینٹر نے والدین پر زور دیا ہے کہ وہ ہر انسدادِ پولیو مہم کے دوران اپنے بچوں کو لازمی طور پر قطرے پلوائیں اور حفاظتی ٹیکہ جات کا کورس بھی مقررہ وقت پر مکمل کروائیں۔

این ای او سی نے معاشرے کے تمام طبقات سے اپیل کی ہے کہ وہ پولیو کے مکمل خاتمے کے لیے قومی کوششوں میں بھرپور تعاون کریں تاکہ بچوں کو عمر بھر کی معذوری سے محفوظ بنایا جاسکے۔