دینی عقائد اور اللہ کی مرضی کے خلاف تمام کام چھوڑ دیے ہیں، اداکارہ لیلیٰ

لاہور: پاکستانی فلم انڈسٹری کی معروف اداکارہ لیلیٰ نے ماضی میں کی گئی اپنی بولڈ پرفارمنسز پر ندامت کا اظہار کرتے ہوئے کہا ہے کہ انہوں نے وہ تمام کام چھوڑ دیے ہیں جو ان کے دینی عقائد اور اللہ کی مرضی کے خلاف تھے۔

حال ہی میں ایک رئیلٹی شو میں گفتگو کرتے ہوئے اداکارہ لیلیٰ نے بتایا کہ گزشتہ چند برسوں کے دوران انہوں نے اپنے رب سے کچھ وعدے کیے ہیں، کیونکہ انہیں احساس ہوا کہ ان کی زندگی میں بعض ایسے کام شامل تھے جو اللہ کو ناپسند ہیں۔

اداکارہ کا کہنا تھا کہ انہوں نے ایسے تمام کام ہمیشہ کے لیے اپنی زندگی سے ختم کر دیے ہیں اور اب وہ اپنے ماضی کو پیچھے چھوڑ کر آگے بڑھنا چاہتی ہیں۔

لیلیٰ نے کہا کہ انسان کو اپنی زندگی اور اپنے اعمال کا جائزہ لیتے رہنا چاہیے اور جب اسے اپنی غلطیوں کا احساس ہو تو بہتری کی جانب قدم بڑھانا چاہیے۔

واضح رہے کہ لیلیٰ کا شمار پاکستان شوبز انڈسٹری کی معروف اداکاراؤں میں ہوتا ہے۔ وہ 1990 کی دہائی سے فلم انڈسٹری سے وابستہ ہیں اور اپنے طویل فنی کیریئر کے دوران مختلف فلموں میں اداکاری کے باعث نمایاں شناخت حاصل کر چکی ہیں۔

اداکارہ کے اس بیان کو ان کی زندگی میں ایک اہم تبدیلی کے طور پر دیکھا جا رہا ہے، جہاں وہ ماضی کے بعض فیصلوں پر ندامت کا اظہار کرتے ہوئے اپنی زندگی کو اپنے دینی عقائد کے مطابق آگے بڑھانے کا عزم ظاہر کر رہی ہیں۔