پٹرولیم قیمتوں میں کمی کا فائدہ عوام کو ملے گا، شفاف فارمولے کیلئے کمیٹی قائم: علی پرویز ملک

(اسلام آباد) وفاقی وزیر پٹرولیم علی پرویز ملک نے کہا ہے کہ عالمی منڈی میں تیل کی قیمتوں میں کمی کا فائدہ براہِ راست عوام تک منتقل کیا جائے گا اور اس مقصد کے لیے پٹرولیم مصنوعات کی قیمتوں کے تعین کا ایک شفاف نظام متعارف کرایا جا رہا ہے۔

اپنے بیان میں علی پرویز ملک نے کہا کہ وزیراعظم شہباز شریف کی ہدایت پر عالمی مارکیٹ میں تیل کی قیمتوں میں ہونے والی کمی کے اثرات عوام تک فوری پہنچانے کے اقدامات کیے جا رہے ہیں۔

انہوں نے بتایا کہ پٹرولیم مصنوعات کی قیمتوں کے تعین کے لیے ایک شفاف ہفتہ وار فارمولہ مرتب کرنے کی غرض سے اعلیٰ سطح کی کمیٹی تشکیل دے دی گئی ہے۔ اس فارمولے کی تیاری میں تمام متعلقہ اداروں اور شراکت داروں سے مشاورت کی جائے گی تاکہ قیمتوں کے تعین کا عمل زیادہ واضح اور قابلِ فہم بنایا جا سکے۔

وفاقی وزیر کے مطابق نئے نظام کے تحت عوام بہتر انداز میں جان سکیں گے کہ پٹرولیم مصنوعات کی قیمتوں میں اضافے یا کمی کی بنیادی وجوہات کیا ہیں اور قیمتوں کا تعین کن عوامل کی بنیاد پر کیا جا رہا ہے۔

علی پرویز ملک نے ایران اور امریکا کے درمیان جنگ بندی معاہدے کا حوالہ دیتے ہوئے کہا کہ وزیراعظم، فیلڈ مارشل، وزیر خارجہ اور وزیر داخلہ کی سفارتی کوششوں کے نتیجے میں اہم پیش رفت ہوئی، جس سے خطے میں استحکام کی راہ ہموار ہوئی۔

انہوں نے مزید کہا کہ علاقائی کشیدگی کے باوجود پاکستان میں تیل کی سپلائی چین کو بلا تعطل برقرار رکھا گیا اور حکومت توانائی سلامتی کے فریم ورک کا ازسرِنو جائزہ لے رہی ہے۔

وفاقی وزیر پٹرولیم کا کہنا تھا کہ قومی مفادات کے تحفظ اور توانائی کے شعبے کو مزید مستحکم بنانے کے لیے متعدد نئے اقدامات پر کام جاری ہے، جبکہ بحران کے دوران تعاون کرنے والے تمام شراکت داروں اور عوام کے تعاون کو سراہتے ہیں۔