امجد حسین بلامقابلہ گلگت بلتستان کے وزیراعلیٰ منتخب، پیپلز پارٹی کی بڑی کامیابی

گلگت: پاکستان پیپلز پارٹی کے سینئر رہنما امجد حسین ایڈووکیٹ بلامقابلہ گلگت بلتستان کے نئے وزیراعلیٰ منتخب ہوگئے ہیں۔ وہ گلگت بلتستان کے پانچویں وزیراعلیٰ کے طور پر اپنی ذمہ داریاں سنبھالیں گے۔

ذرائع کے مطابق امجد حسین ایڈووکیٹ پاکستان پیپلز پارٹی کے اہم رہنماؤں میں شمار ہوتے ہیں۔ ان کے والد مرحوم آصف خان بھی پیپلز پارٹی کے بااثر سیاسی رہنما رہے ہیں۔ امجد حسین نے ابتدائی تعلیم حاصل کرنے کے بعد پنجاب یونیورسٹی سے قانون کی ڈگری حاصل کی اور 1996 میں طلبہ سیاست سے اپنے سیاسی سفر کا آغاز کیا۔

امجد حسین گلگت بلتستان بار کونسل کے رکن اور سپریم اپیلیٹ کورٹ کے سینئر وکیل بھی رہ چکے ہیں۔ وہ 2010 سے 2015 تک گلگت بلتستان کونسل کے رکن رہے جبکہ 2016 میں پاکستان پیپلز پارٹی گلگت بلتستان کے صوبائی صدر منتخب ہوئے۔

2020 کے عام انتخابات میں انہوں نے دو حلقوں سے کامیابی حاصل کی اور پارٹی کے اہم رہنما کے طور پر اپنی سیاسی حیثیت مزید مستحکم کی۔ وزیراعلیٰ منتخب ہونے کے بعد انہیں مختلف سیاسی و سماجی حلقوں کی جانب سے مبارکباد دی جا رہی ہے۔

دوسری جانب پاکستان مسلم لیگ (ن) کے حافظ حفیظ الرحمان گلگت بلتستان اسمبلی میں اپوزیشن لیڈر منتخب ہوگئے ہیں۔ نو منتخب وزیراعلیٰ امجد حسین کی حلف برداری کی تقریب کی تاریخ کا اعلان بعد میں کیا جائے گا۔