خیبرپختونخوا میں ایمرجنسی پہلے ہی نافذ ہوجانی چاہیے تھی، حالات قابو سے باہر ہو رہے تھے: نواز شریف

لندن: سابق وزیراعظم اور مسلم لیگ (ن) کے صدر نواز شریف نے کہا ہے کہ خیبرپختونخوا میں امن و امان کی صورتحال خراب ہو چکی تھی اور حالات قابو سے باہر ہو رہے تھے، اس لیے صوبے میں ایمرجنسی پہلے ہی نافذ ہوجانی چاہیے تھی۔

لندن میں صحافیوں سے گفتگو کرتے ہوئے نواز شریف نے پاکستان تحریک انصاف کی صوبائی حکومت کو تنقید کا نشانہ بنایا۔ ان کا کہنا تھا کہ پی ٹی آئی نے گزشتہ 13 سال کے دوران خیبرپختونخوا کو نقصان پہنچایا ہے اور صوبے میں امن و امان کی صورتحال پر توجہ دینے کی ضرورت تھی۔

نواز شریف نے سوال اٹھایا کہ کسی ملک میں وزیراعلیٰ سرکاری وسائل استعمال کرتے ہوئے وفاقی دارالحکومت پر حملہ کیسے کر سکتا ہے؟ انہوں نے کہا کہ صوبائی وسائل کو اسلام آباد اور دوسرے صوبوں کے خلاف استعمال کرنا درست طرزِ عمل نہیں ہے۔

مسلم لیگ (ن) کے صدر نے دعویٰ کیا کہ خیبرپختونخوا کے عوام تحریک انصاف کی حکومت سے آزاد ہوگئے ہیں۔ ان کا کہنا تھا کہ مسلم لیگ (ن) پاکستان کی ترقی اور خوشحالی کے لیے پرعزم ہے۔

انہوں نے مزید کہا کہ وفاقی اور صوبائی حکومتیں عام آدمی کی بہتری کے لیے کوششیں کر رہی ہیں اور ملک کی ترقی و خوشحالی کے لیے اقدامات جاری رہنے چاہییں۔