پاکستان میں کرکٹ کھیلنا چیلنجنگ ہے، لیکن مجھے زیادہ اعتماد محسوس ہوتا ہے: ہیری بروک

راولپنڈی: انگلینڈ کرکٹ ٹیم کے کپتان ہیری بروک نے کہا ہے کہ پاکستان میں کرکٹ کھیلنا چیلنجنگ ہوتا ہے، تاہم یہاں کھیلتے ہوئے وہ زیادہ اعتماد محسوس کرتے ہیں۔ ون ڈے ٹرائی سیریز میں بہترین ٹیموں کے درمیان سخت مقابلے کی توقع ہے۔

راولپنڈی کرکٹ اسٹیڈیم میں پریس کانفرنس کرتے ہوئے ہیری بروک نے کہا کہ وہ پاکستان سپر لیگ میں لاہور قلندرز کی نمائندگی کر چکے ہیں، جس سے انہیں پاکستانی کنڈیشنز اور مقامی کھلاڑیوں کو سمجھنے میں مدد ملی۔ ان کے مطابق 22 سال کی عمر میں پی ایس ایل کھیلنے کا تجربہ انٹرنیشنل کرکٹ میں ان کے لیے بہت مفید ثابت ہوا۔

انگلش کپتان نے کہا کہ ان کی ٹیم ایسی بننا چاہتی ہے جو ہر طرح کی کنڈیشنز میں کامیابی حاصل کر سکے اور کسی بھی ہدف کا تعاقب کرنے کی صلاحیت رکھتی ہو۔ وہ انگلینڈ کے لیے زیادہ سے زیادہ کرکٹ کھیلنا چاہتے ہیں۔

ہیری بروک کا کہنا تھا کہ انگلینڈ کی موجودہ ٹیم زیادہ تجربہ کار نہیں، کیونکہ اس کے چند کھلاڑیوں نے ہی 50 ون ڈے میچز کھیلے ہیں۔