بلوچستان میں امن و ترقی کیلئے ریاستی کوششیں پوری قوت سے جاری ہیں، صدر مملکت

(اسلام آباد) صدر مملکت آصف علی زرداری نے کہا ہے کہ بلوچستان میں امن و ترقی کیلئے ریاستی کوششیں پوری قوت سے جاری ہیں اور دہشتگرد عناصر کے مذموم عزائم ناکام بنائے جائیں گے۔

تفصیلات کے مطابق صدر مملکت آصف علی زرداری سے بلوچستان سے تعلق رکھنے والے اراکین پارلیمنٹ نے ملاقات کی، جس میں صوبے کی مجموعی سیاسی صورتحال اور جاری ترقیاتی منصوبوں پر تبادلہ خیال کیا گیا۔

ملاقات میں سردار محمد عمر گورگیج، میر عبدالقدوس بزنجو، بلال مندوخیل، حسنیٰ بانو، نوابزادہ جمال رئیسانی، ملک شاہ گورگیج، فیصل جمالی، بخت کاکڑ، علی مدد جتک، نواب ثنااللہ زہری، علی حسن زہری اور لیاقت لہڑی شریک تھے۔

اس موقع پر صدر مملکت نے ملک بھر میں غیر ملکی پشت پناہی میں سرگرم دہشتگرد عناصر کے مذموم عزائم ناکام بنانے کے عزم کا اعادہ کیا۔

صدر مملکت نے بلوچستان میں جاری ترقیاتی منصوبوں کی اہمیت پر زور دیتے ہوئے کہا کہ صوبے کی ترقی اور استحکام حکومت کی اولین ترجیح ہے۔