آزاد کشمیر میں مہاجر نشستوں پر اعتراضات سازش کا حصہ ہیں، مسلم لیگ (ن) حکومت بنائے گی: عطا تارڑ

لاہور: وفاقی وزیر اطلاعات و نشریات عطا تارڑ نے کہا ہے کہ آزاد کشمیر میں مہاجر نشستوں پر اعتراضات دراصل ایک سازش کا حصہ ہیں اور عوام ایسے عناصر کے عزائم سے بخوبی واقف ہیں۔

لاہور میں پارٹی کارکنوں سے خطاب کرتے ہوئے عطا تارڑ نے کہا کہ آزاد کشمیر کے انتخابات میں میرپور ڈویژن سے مسلم لیگ (ن) کے امیدوار کامیاب ہوئے ہیں اور انہیں مکمل یقین ہے کہ آزاد کشمیر میں حکومت بھی مسلم لیگ (ن) ہی تشکیل دے گی۔

انہوں نے کہا کہ آزاد کشمیر میں انتخابی عمل جاری ہے اور مختلف علاقوں میں عوام مسلم لیگ (ن) اور اس کے انتخابی نشان شیر کی بھرپور حمایت کر رہے ہیں۔

وفاقی وزیر اطلاعات نے کہا کہ کچھ عناصر مہاجر نشستوں پر بلاجواز اعتراضات اٹھا کر انتخابی عمل کو متنازع بنانے کی کوشش کر رہے ہیں، تاہم عوام ان کے مقاصد کو اچھی طرح سمجھتے ہیں اور ایسے ہتھکنڈے کامیاب نہیں ہوں گے۔

عطا تارڑ نے کہا کہ مسلم لیگ (ن) نے ہمیشہ مسئلہ کشمیر کو قومی اور بین الاقوامی سطح پر مؤثر انداز میں اجاگر کیا ہے۔ ان کے مطابق وزیراعظم شہباز شریف نے بھی اقوام متحدہ سمیت عالمی فورمز پر کشمیری عوام کے حق خودارادیت اور مسئلہ کشمیر کو بھرپور انداز میں پیش کیا۔

انہوں نے کہا کہ ہر سیاسی جماعت کو سیاست کرنے اور انتخابی مہم چلانے کا حق حاصل ہے، تاہم عوام کو ترقیاتی منصوبوں، کارکردگی اور مستقبل کے پروگراموں سے بھی آگاہ کرنا ضروری ہے۔

وفاقی وزیر اطلاعات نے دعویٰ کیا کہ عوامی خدمت، ترقیاتی منصوبوں اور کارکردگی کے میدان میں مسلم لیگ (ن) کا کوئی مقابلہ نہیں اور یہی وجہ ہے کہ عوام کا اعتماد پارٹی پر برقرار ہے۔