ایرانی سپریم نیشنل سکیورٹی کونسل کا آیت اللہ علی خامنہ ای کے خون کا بدلہ لینے کا اعلان، پیغام جاری

تہران: ایران کی سپریم نیشنل سکیورٹی کونسل سے منسوب ایک پیغام میں آیت اللہ علی خامنہ ای کے خون کا بدلہ لینے کے عزم کا اظہار کیا گیا ہے۔

رپورٹس کے مطابق ایران کے سرکاری میڈیا نے سپریم نیشنل سکیورٹی کونسل کے سیکرٹری محمد باقر ذوالقدر کے دستخط سے منسوب ایک پیغام شائع کیا، جس میں کہا گیا ہے کہ آیت اللہ علی خامنہ ای کے قاتلوں سے ان کے خون کا بدلہ ضرور لیا جائے گا۔

رپورٹس میں مزید دعویٰ کیا گیا ہے کہ یہ پیغام سوشل میڈیا پلیٹ فارم ایکس پر بھی جاری کیا گیا، جبکہ یہ بھی کہا گیا ہے کہ آیت اللہ علی خامنہ ای 28 فروری کو ایران پر امریکہ اور اسرائیل کے مبینہ حملے کے پہلے روز شہید ہوئے تھے۔ ان دعوؤں کے مطابق اس حملے میں ان کے خاندان کے بعض افراد اور ایران کے کئی اہم عہدیدار بھی جاں بحق ہوئے۔

رپورٹس کے مطابق آیت اللہ علی خامنہ ای کی تدفین کی تقریبات 4 سے 8 جولائی تک تہران، قم اور مشہد میں منعقد کی جائیں گی، جبکہ عراق کے بغداد، کاظمین، کربلا اور نجف میں بھی سوگ کی تقریبات کے انعقاد کا دعویٰ کیا گیا ہے۔