بابر اعظم پاکستان ٹیسٹ ٹیم کے کپتان مقرر، ویسٹ انڈیز اور انگلینڈ دورے کیلئے 16 رکنی سکواڈ کا اعلان

(لاہور) پاکستان کرکٹ بورڈ نے ویسٹ انڈیز اور انگلینڈ کے دورے کے لیے قومی ٹیسٹ ٹیم کا 16 رکنی سکواڈ اعلان کرتے ہوئے بابر اعظم کو دوبارہ ٹیسٹ ٹیم کی قیادت سونپ دی ہے۔

لاہور میں پریس کانفرنس کے دوران سلیکشن کمیٹی کے رکن عاقب جاوید نے اسد شفیق اور مصباح الحق کے ہمراہ سکواڈ کا اعلان کیا۔ اعلان کردہ ٹیم میں بابر اعظم (کپتان)، شان مسعود، امام الحق، اذان اویس، عبداللہ فضل، سلمان علی آغا، غازی غوری، محمد رضوان، ساجد خان، علی عثمان، عامر جمال، محمد علی، محمد عباس، عبید شاہ، اویس ظفر اور خرم شہزاد شامل ہیں۔

سلیکشن کمیٹی کے مطابق مڈل آرڈر بیٹر سعود شکیل فٹنس مسائل کے باعث اسکواڈ میں جگہ نہیں بنا سکے۔

پاکستان ٹیم اپنے دورے کا آغاز ویسٹ انڈیز کے خلاف ٹیسٹ سیریز سے کرے گی۔ قومی ٹیم 18 جولائی کو ٹراوبا میں وارم اپ میچ کھیلے گی، جبکہ ویسٹ انڈیز کے خلاف پہلا ٹیسٹ 25 سے 29 جولائی تک ٹراوبا میں کھیلا جائے گا۔

پریس کانفرنس سے خطاب کرتے ہوئے عاقب جاوید نے کہا کہ وہ اور اسد شفیق گزشتہ 18 ماہ سے سلیکشن کمیٹی کا حصہ ہیں، جبکہ مصباح الحق اور سرفراز احمد گزشتہ 6 ماہ سے کمیٹی میں شامل ہیں۔

انہوں نے کہا کہ کرکٹ کے تینوں فارمیٹس کی ضروریات مختلف ہوتی ہیں، اس لیے ہر کھلاڑی کی کارکردگی کو متعلقہ فارمیٹ کے مطابق جانچا جاتا ہے۔

عاقب جاوید کا کہنا تھا کہ کپتان پر بھی نتائج کی ذمہ داری عائد ہوتی ہے۔ ان کے مطابق شان مسعود کی ذاتی کارکردگی اچھی رہی، تاہم ٹیم مطلوبہ نتائج حاصل نہیں کر سکی، اسی لیے قیادت میں تبدیلی کا فیصلہ کیا گیا تاکہ ٹیم کی مجموعی کارکردگی میں بہتری لائی جا سکے۔

انہوں نے مزید کہا کہ قومی ٹیم کے فاسٹ بولرز کی رفتار بھی تشویش کا باعث ہے اور اس شعبے پر خصوصی توجہ دی جا رہی ہے۔

اس موقع پر سابق کپتان مصباح الحق نے کہا کہ کرکٹ میں کامیابی کے لیے تسلسل بنیادی اہمیت رکھتا ہے۔ ان کے مطابق کسی بھی کھلاڑی یا کپتان کی کامیابی کا دارومدار اس کی مستقل مزاج کارکردگی پر ہوتا ہے۔