آبنائے ہرمز ہماری طاقت، میزائل پروگرام اور یورینیم افزودگی پر کوئی سمجھوتا نہیں ہوگا: ایرانی اسپیکر

(تہران) ایرانی پارلیمنٹ کے اسپیکر محمد باقر قالیباف نے کہا ہے کہ آبنائے ہرمز ایران کی سب سے اہم تزویراتی طاقت ہے اور تہران اس آبی گزرگاہ پر اپنی خودمختاری یا دفاعی مؤقف پر کسی بھی صورت سمجھوتہ نہیں کرے گا۔

سرکاری میڈیا سے گفتگو کرتے ہوئے محمد باقر قالیباف نے امریکا کے ساتھ طے پانے والی مفاہمتی یادداشت (ایم او یو) پر اظہار خیال کرتے ہوئے کہا کہ معاہدے کے تحت آبنائے ہرمز میں سمندری خدمات کی فیس سے صرف 60 روزہ عارضی استثنا دیا گیا ہے، تاہم اس سے یہ تاثر نہیں لیا جانا چاہیے کہ ایران اپنے اصولی مؤقف سے پیچھے ہٹ گیا ہے۔

انہوں نے کہا کہ آبنائے ہرمز ایران کی علاقائی سمندری حدود کا حصہ ہے اور امریکا کو یہ تاثر دینے سے گریز کرنا چاہیے کہ ایران نے اس اہم آبی گزرگاہ کو عسکری مقاصد کے لیے استعمال کیا ہے۔ ان کے مطابق آبنائے ہرمز ایران کے لیے خدا کی عطا کردہ نعمت اور ایک اہم تزویراتی اثاثہ ہے، جبکہ اس کے انتظامی اور قانونی امور پر ایران اور عمان کے درمیان مکمل اتفاق رائے موجود ہے۔

ایرانی اسپیکر نے واضح کیا کہ امریکا کے ساتھ مذاکرات اسی وقت آگے بڑھ سکتے ہیں جب مفاہمتی یادداشت کی بنیادی شقوں پر عملدرآمد یقینی بنایا جائے، جن میں لبنان میں جنگ بندی، ایرانی تیل کی برآمدات کی بحالی اور ایران کے منجمد اثاثوں کی رہائی شامل ہیں۔

انہوں نے بتایا کہ ایران، امریکا اور لبنان کے درمیان کشیدگی سے بچاؤ کے لیے ایک مشترکہ رابطہ سیل قائم کرنے پر بھی اتفاق ہوا ہے، جس کے لیے تہران اور واشنگٹن اپنے نمائندے مقرر کر چکے ہیں جبکہ لبنان کی جانب سے بھی جلد نمائندہ نامزد کیے جانے کی توقع ہے۔

محمد باقر قالیباف نے دعویٰ کیا کہ امریکی بحری ناکہ بندی کے خاتمے کے بعد صرف دو ہفتوں سے بھی کم عرصے میں ایران نے 4 کروڑ بیرل سے زائد تیل برآمد کیا، جو ان کے بقول مؤثر سفارت کاری اور مضبوط دفاعی حکمت عملی کے نتائج کا مظہر ہے۔

انہوں نے دوٹوک انداز میں کہا کہ ایران کا میزائل پروگرام، دفاعی صلاحیتیں اور یورینیم افزودگی کا حق کسی بھی صورت مذاکرات کا حصہ نہیں بن سکتے۔ ان کے مطابق یورینیم افزودگی ایران کا قانونی اور ناقابلِ تنسیخ حق ہے جس پر کوئی سمجھوتا نہیں کیا جائے گا۔

ایرانی اسپیکر نے مزید کہا کہ اگر امریکا اور اقوام متحدہ کی تمام پابندیاں ختم نہ ہوئیں تو مذاکرات جاری رہیں گے اور ضرورت پڑنے پر مفاہمتی یادداشت کی 60 روزہ مدت میں توسیع پر بھی غور کیا جا سکتا ہے۔