بلاول بھٹو کا اپوزیشن کو پارلیمانی کمیٹیوں میں واپس آنے کا مشورہ

اسلام آباد: چیئرمین پاکستان پیپلز پارٹی بلاول بھٹو زرداری نے اپوزیشن کو پارلیمانی کمیٹیوں میں واپس آنے کا مشورہ دیتے ہوئے کہا ہے کہ پارلیمان کو مضبوط بنانے کے لیے اپوزیشن کو بھی اپنا فعال کردار ادا کرنا ہوگا۔

قومی اسمبلی کے اجلاس سے خطاب کرتے ہوئے بلاول بھٹو زرداری نے کہا کہ اگر اپوزیشن لیڈر پارلیمان کو مضبوط بنانا چاہتے ہیں تو انہیں اپنے ارکان کو پارلیمانی کمیٹیوں میں بٹھانا چاہیے۔

انہوں نے کہا کہ حکومت کو اپنی ذمہ داریاں پوری کرنی چاہئیں، تاہم اپوزیشن پر بھی لازم ہے کہ وہ پارلیمانی امور میں مؤثر کردار ادا کرے۔ ان کا کہنا تھا کہ اپوزیشن ارکان کے فنانس کمیٹی میں شریک نہ ہونے سے پارلیمان کمزور ہوا ہے۔

چیئرمین پیپلز پارٹی نے کہا کہ پارلیمان طاقتور ہوگا تو تمام سیاسی جماعتیں بھی مضبوط ہوں گی۔ اپوزیشن کے پاس جو اختیار موجود ہے، اسے استعمال کرنا چاہیے تاکہ پارلیمانی نظام کو مؤثر بنایا جا سکے۔

بلاول بھٹو زرداری نے انتخابی اصلاحات کا حوالہ دیتے ہوئے کہا کہ اس مقصد کے لیے کمیٹی تشکیل دی جاتی ہے، لیکن اگر اپوزیشن اس میں شریک ہی نہ ہو تو ایسی کمیٹی بنانے کا کیا فائدہ ہوگا؟

انہوں نے اپوزیشن پر زور دیا کہ وہ پارلیمانی کمیٹیوں میں واپس آئے اور قانون سازی سمیت اہم قومی معاملات پر اپنا کردار ادا کرے۔