گلگت بلتستان کے حقوق، روزگار اور ترقی پیپلز پارٹی کی ترجیح ہے، بلاول بھٹو

غذر: پاکستان پیپلز پارٹی کے چیئرمین بلاول بھٹو زرداری نے کہا ہے کہ پیپلز پارٹی اور گلگت بلتستان کے عوام کا رشتہ نسلوں پر محیط ہے اور اس بار غذر کی تینوں نشستوں پر کامیابی پیپلز پارٹی کا مقدر ہوگی۔

غذر میں ایک بڑے انتخابی جلسے سے خطاب کرتے ہوئے بلاول بھٹو زرداری نے کہا کہ پیپلز پارٹی کا گلگت بلتستان کے عوام کے ساتھ دیرینہ تعلق ہے اور عوام کی حمایت سے پارٹی خطے میں ایک بار پھر کامیابی حاصل کرے گی۔ انہوں نے کہا کہ عوام انہیں بھاری اکثریت سے کامیاب بنائیں تاکہ حقِ ملکیت، حقِ حاکمیت اور دیگر آئینی حقوق کے حصول کو یقینی بنایا جا سکے۔

انہوں نے کہا کہ سابق صدر آصف علی زرداری نے گلگت بلتستان کو شناخت دی، جبکہ اب نئی نسل کی ذمہ داری ہے کہ وہ اپنے حقوق کی جدوجہد کو مزید آگے بڑھائے۔ بلاول بھٹو نے وعدہ کیا کہ پیپلز پارٹی اقتدار میں آکر حقِ ملکیت سے متعلق قانون سازی کرے گی، آئینی تحفظ فراہم کرے گی اور گلگت بلتستان کے مطالبات کو وفاقی سطح پر مؤثر انداز میں پیش کرے گی۔

چیئرمین پیپلز پارٹی نے کہا کہ اگر پارٹی کو واضح مینڈیٹ نہ ملا تو دیگر سیاسی جماعتیں مجوزہ اصلاحات اور قانون سازی کی راہ میں رکاوٹ بن سکتی ہیں۔ انہوں نے عوام سے اپیل کی کہ وہ اپنے حقوق اور روشن مستقبل کے لیے پیپلز پارٹی کا ساتھ دیں۔

بلاول بھٹو زرداری نے روزگار، ہاؤسنگ اور سماجی بہبود کے منصوبوں کا ذکر کرتے ہوئے کہا کہ سندھ کی طرز پر گلگت بلتستان میں بھی ہاؤسنگ اسکیمیں متعارف کرائی جائیں گی اور نوجوانوں کے لیے روزگار کے نئے مواقع پیدا کیے جائیں گے۔ ان کا کہنا تھا کہ پیپلز پارٹی نے ہمیشہ عوام کو روزگار فراہم کیا جبکہ دیگر جماعتوں کی پالیسیوں کے باعث بے روزگاری میں اضافہ ہوا۔

انہوں نے بینظیر انکم سپورٹ پروگرام کو پیپلز پارٹی کی بڑی کامیابی قرار دیتے ہوئے اعلان کیا کہ آئندہ بجٹ میں گلگت بلتستان کے لیے اس پروگرام کے فنڈز میں اضافہ کیا جائے گا تاکہ زیادہ سے زیادہ مستحق خاندانوں کی مدد ممکن ہو سکے۔

صحت کے شعبے کے حوالے سے بلاول بھٹو نے کہا کہ پیپلز پارٹی کی حکومت بننے کے بعد گلگت بلتستان میں جدید اسپتال قائم کیے جائیں گے اور عوام کو مفت علاج کی سہولیات فراہم کی جائیں گی تاکہ لوگوں کو علاج کے لیے دیگر شہروں کا رخ نہ کرنا پڑے۔

انہوں نے توانائی کے شعبے میں گلگت بلتستان کی صلاحیتوں کا ذکر کرتے ہوئے کہا کہ خطے میں پن بجلی کے وسیع مواقع موجود ہیں۔ پبلک پرائیویٹ پارٹنرشپ کے تحت نئے بجلی گھر قائم کرکے گلگت بلتستان کو توانائی کے شعبے میں خود کفیل بنایا جا سکتا ہے۔

اپنے خطاب کے اختتام پر بلاول بھٹو زرداری نے عوام سے 7 جون کو پاکستان پیپلز پارٹی کے انتخابی نشان "تیر" پر مہر لگانے کی اپیل کرتے ہوئے کہا کہ یہ ووٹ گلگت بلتستان کے حقوق، ترقی اور خوشحال مستقبل کے لیے ہوگا۔