امریکی ریاست جارجیا میں بلاک پارٹی میں خونی فائرنگ: 2 نوجوان ہلاک اور 35 افراد زخمی

ویانا: امریکی ریاست جارجیا کے شہر ویانا میں ایک پر رونق محلے کی 'بلاک پارٹی' کے دوران اچانک فائرنگ کا ہولناک واقعہ پیش آیا، جس کے نتیجے میں 2 افراد ہلاک اور 35 زخمی ہوگئے۔ حکام کے مطابق فائرنگ کے اس واقعے میں جان کی بازی ہارنے والے دونوں افراد کی عمریں 21 اور 23 سال تھیں۔ خونی کھیل شروع ہونے کے وقت پارٹی میں سینکڑوں کی تعداد میں افراد موجود تھے، جن میں بڑی تعداد نوجوانوں کی تھی۔ اچانک فائرنگ کی آوازوں سے موقع پر شدید بھگدڑ مچ گئی اور لوگ اپنی جان بچانے کے لیے ادھر ادھر بھاگنے لگے۔ واقعے کی اطلاع ملتے ہی پولیس اور قانون نافذ کرنے والے ادارے فوری طور پر موقع پر پہنچ گئے۔

پولیس نے پورے علاقے کو گھیرے میں لے کر شواہد اکٹھے کرنا شروع کر دیے ہیں۔ حکام کا کہنا ہے کہ فائرنگ کے محرکات اور ملزمان کا تاحال حتمی طور پر پتہ نہیں چل سکا، تاہم واقعے کی جامع تفتیش جاری ہے تاکہ ملوث عناصر کو قانون کی گرفت میں لایا جا سکے۔ زخمی ہونے والے افراد کو قریبی اسپتالوں میں منتقل کر دیا گیا ہے جہاں انہیں طبی امداد فراہم کی جا رہی ہے۔