بشریٰ انصاری کا ناقدین کو جواب، میری عمر پر تنقید چھوڑ کر کچھ نیا سوچیں

(کراچی )پاکستان کی سینئر اداکارہ بشریٰ انصاری نے عمر سے متعلق تنقید کرنے والوں کو آڑے ہاتھوں لیتے ہوئے کہا ہے کہ ناقدین کو اب پرانے طعنے دہرانے کے بجائے کچھ نیا سوچنا چاہیے۔

بشریٰ انصاری اپنی بھانجی زارا نور عباس کی انسٹاگرام اسٹوریز میں گفتگو کر رہی تھیں، جہاں انہوں نے کہا کہ بعض لوگ ہر وقت کسی کو بوڑھا اور کسی کو موٹا کہنے میں مصروف رہتے ہیں، جبکہ ایسے رویے نہایت عجیب اور غیر ضروری ہیں۔

گفتگو کے دوران زارا نور عباس کے شوہر اسد صدیقی نے جب پوچھا کہ وہ کن لوگوں کی بات کر رہی ہیں تو بشریٰ انصاری نے مزاحیہ انداز میں جواب دیا کہ ان ناقدین کے سوشل میڈیا پروفائلز پر اکثر پرندوں کی تصاویر لگی ہوتی ہیں، حالانکہ کچھ اور ہونا چاہیے۔

اس موقع پر ان کی بہن اور اداکارہ اسما عباس بھی گفتگو میں شامل ہوئیں اور کہا کہ وہ بھی عمر سے متعلق ایک جیسے تبصرے سن سن کر تنگ آ چکی ہیں۔

بشریٰ انصاری نے کہا کہ شاید انہیں کوئی ایسا کام کرنا چاہیے جس پر واقعی لوگ بات کریں، کیونکہ اس وقت ناقدین کے پاس ان کی عمر کے علاوہ تنقید کے لیے کوئی دوسرا موضوع نہیں۔

انہوں نے مزید کہا کہ ممکن ہے بعض افراد ان سے اور ان کی بہن سے اس لیے حسد کرتے ہوں کہ وہ عمر کے اس مرحلے میں بھی بھرپور، متحرک اور مصروف زندگی گزار رہی ہیں، جبکہ تنقید کرنے والے خود فارغ بیٹھے ہیں۔