بشریٰ بی بی آنکھ کے معائنے کیلئے اڈیالہ جیل سے اسپتال منتقل

(راولپنڈی) بانی چیئرمین پاکستان تحریک انصاف عمران خان کی اہلیہ بشریٰ بی بی کو آنکھ کے طبی معائنے کیلئے اڈیالہ جیل سے راولپنڈی کے الشفاء ٹرسٹ آئی اسپتال منتقل کر دیا گیا۔

ذرائع کے مطابق بشریٰ بی بی کو سخت سیکیورٹی انتظامات کے تحت اسپتال لایا گیا، اطلاعات کے مطابق بشریٰ بی بی کی آنکھ کی سرجری 17 اپریل کو اسی اسپتال میں کی گئی تھی، جس کے بعد ابتدائی طبی معائنہ جیل میں جاری رکھا گیا۔ تاہم ڈاکٹروں کی ہدایت پر مزید تفصیلی معائنے کیلئے انہیں دوبارہ اسپتال منتقل کیا گیا۔

سیکیورٹی کے سخت انتظامات کے باعث اسپتال اور اس کے اطراف میں نقل و حرکت محدود رکھی گئی جبکہ قانون نافذ کرنے والے اداروں کی اضافی نفری بھی تعینات کی گئی۔

حکام کے مطابق بشریٰ بی بی کی اسپتال منتقلی معمول کے طبی پروٹوکول کے تحت عمل میں لائی گئی تاکہ ان کی صحت کا مکمل جائزہ لیا جا سکے اور آئندہ علاج سے متعلق فیصلہ کیا جا سکے۔