چین کا امریکا ایران معاہدے کا خیرمقدم، پاکستان کی ثالثی کوششوں کو قابلِ ستائش قرار

(یجنگ) چین نے امریکا اور ایران کے درمیان پہلے مرحلے کی مفاہمتی یادداشت کے متن پر اتفاق رائے کا خیرمقدم کرتے ہوئے اس پیش رفت میں پاکستان کی سفارتی اور ثالثی کوششوں کو قابلِ ستائش قرار دیا ہے۔

چینی وزارت خارجہ کے ترجمان لین جیان نے معمول کی پریس بریفنگ کے دوران ایک سوال کے جواب میں کہا کہ چین امریکا اور ایران کے درمیان طے پانے والی حالیہ مفاہمت کو ایک مثبت اور تعمیری پیش رفت سمجھتا ہے۔ ان کا کہنا تھا کہ پاکستان کی جانب سے دونوں ممالک کے درمیان مذاکرات میں سہولت کاری اور رابطہ کاری کی کوششوں کو بیجنگ قدر کی نگاہ سے دیکھتا ہے۔

چینی ترجمان نے امید ظاہر کی کہ امریکا اور ایران طے شدہ شیڈول کے مطابق معاہدے پر دستخط کریں گے اور اختلافات کو مذاکرات اور سفارت کاری کے ذریعے حل کرنے کی روایت کو مزید مضبوط بنائیں گے۔

لین جیان سے پاکستان کے وزیراعظم کی جانب سے کیے گئے اس اعلان پر تبصرہ کرنے کو کہا گیا تھا، جس میں بتایا گیا تھا کہ امریکا اور ایران مذاکرات کے ذریعے پہلے مرحلے کی مفاہمتی یادداشت کے متن پر متفق ہو گئے ہیں اور لبنان سمیت مختلف خطوں میں فوجی کارروائیوں کے فوری اور مستقل خاتمے کا اعلان کیا گیا ہے۔

چینی وزارت خارجہ کے ترجمان نے کہا کہ چین امید کرتا ہے کہ تمام متعلقہ فریق امن اور استحکام کے راستے پر کاربند رہیں گے اور باہمی اختلافات کو بات چیت اور مذاکرات کے ذریعے حل کریں گے۔ انہوں نے مشرق وسطیٰ اور خلیجی خطے میں امن و استحکام کی اہمیت پر زور دیتے ہوئے کہا کہ چین علاقائی تنازعات کے حل کے لیے سفارتی اور سیاسی ذرائع کی حمایت جاری رکھے گا۔

ان کا مزید کہنا تھا کہ چین عالمی برادری کے ساتھ مل کر مشرق وسطیٰ اور خلیجی خطے میں امن و استحکام کی جلد بحالی کے لیے تعمیری اور مثبت کردار ادا کرنے کے لیے تیار ہے۔ انہوں نے اس بات کا اعادہ کیا کہ چین ہمیشہ سے سیاسی مکالمے اور پرامن مذاکرات کو تنازعات کے حل اور کشیدگی میں کمی کا سب سے مؤثر ذریعہ قرار دیتا آیا ہے۔

چینی ترجمان کے مطابق امریکا اور ایران کے درمیان حالیہ مفاہمت نہ صرف خطے میں کشیدگی کم کرنے میں مددگار ثابت ہو سکتی ہے بلکہ وسیع تر علاقائی استحکام اور عالمی امن کے فروغ کے لیے بھی سازگار ماحول پیدا کرے گی۔