پاک چین دوستی نسلوں پر محیط، سی پیک سے تعاون مزید مضبوط ہوگا: چینی سفیر

(اسلام آباد) پاکستان میں تعینات چینی سفیر جیانگ زائے ڈونگ نے کہا ہے کہ پاک چین دوستی نسلوں پر محیط ہے اور دونوں ممالک کے درمیان ہر موسم کی تزویراتی شراکت داری کو مزید مستحکم بنایا جائے گا، جبکہ سی پیک کے دوسرے مرحلے (سی پیک 2.0) پر بھی تیزی سے کام کیا جائے گا۔

اسلام آباد میں کمیونسٹ پارٹی آف چائنہ کے قیام کی 105ویں سالگرہ کے موقع پر منعقدہ تقریب سے خطاب کرتے ہوئے چینی سفیر نے کہا کہ چین نے 2025 میں 140.2 ٹریلین یوآن کی مجموعی قومی پیداوار (جی ڈی پی) حاصل کی، جبکہ رواں سال کی پہلی سہ ماہی میں معیشت کی شرح نمو 5 فیصد رہی۔

انہوں نے بتایا کہ بیلٹ اینڈ روڈ انیشی ایٹو کے تحت دنیا بھر میں ایک ٹریلین ڈالر سے زائد کی سرمایہ کاری کی جا چکی ہے، جبکہ چین پاکستان اقتصادی راہداری (سی پیک) کے تحت پاکستان میں 25.9 ارب ڈالر سے زائد کی براہ راست سرمایہ کاری ہوئی، جس سے 2 لاکھ 60 ہزار سے زائد روزگار کے مواقع پیدا ہوئے۔

چینی سفیر کے مطابق سی پیک منصوبے کے ذریعے 8 ہزار میگاواٹ سے زائد بجلی کی پیداوار اور 510 کلومیٹر طویل ایکسپریس ویز کی تعمیر بھی مکمل کی گئی ہے، جس نے پاکستان کے بنیادی ڈھانچے اور توانائی کے شعبے میں نمایاں بہتری لانے میں اہم کردار ادا کیا۔

جیانگ زائے ڈونگ نے کہا کہ مالی سال 2026 میں پاکستان کی معیشت 3.7 فیصد کی شرح سے ترقی کر رہی ہے جبکہ ملک کی مجموعی قومی پیداوار 452 ارب ڈالر کی ریکارڈ سطح تک پہنچ گئی ہے۔

انہوں نے اپنے خطاب میں کہا کہ پاکستان نے ایران اور امریکا کے درمیان مفاہمتی عمل میں سہولت کاری کر کے خطے میں امن و استحکام کے لیے مثبت کردار ادا کیا ہے۔

چینی سفیر نے مزید کہا کہ پاکستان اور چین کے سفارتی تعلقات کے 75 سال مکمل ہونے کے موقع پر دونوں ممالک مختلف شعبوں میں تعاون کو مزید وسعت دیں گے، جبکہ سی پیک 2.0 کے تحت صنعتی، تجارتی اور ترقیاتی منصوبوں کو بھی تیز رفتاری سے آگے بڑھایا جائے گا۔

انہوں نے اس عزم کا اعادہ کیا کہ چین اور پاکستان مشترکہ ترقی، اقتصادی خوشحالی اور خطے میں پائیدار استحکام کے لیے اپنی دیرینہ شراکت داری کو مزید مضبوط بنانے کا سلسلہ جاری رکھیں گے۔