کاکروچ جنتا پارٹی کی مودی سرکار کو دوبارہ احتجاج کی دھمکی، گرفتار مظاہرین کی رہائی کا مطالبہ

نئی دہلی: کاکروچ جنتا پارٹی نے مودی حکومت کو ایک بار پھر احتجاج شروع کرنے کی دھمکی دیتے ہوئے مطالبہ کیا ہے کہ گرفتار کارکنوں اور مظاہرین کو فوری طور پر رہا کیا جائے اور ان کے خلاف درج تمام مقدمات واپس لیے جائیں۔

پارٹی کے ترجمان نے اپنے بیان میں کہا کہ احتجاج ختم کرنے کے باوجود خدشہ تھا کہ طلبا اور کارکنوں کو دوبارہ گرفتار کیا جائے گا، اور اب یہی خدشات درست ثابت ہوئے ہیں۔ انہوں نے حکومت سے مطالبہ کیا کہ کل تک تمام گرفتار مظاہرین کو رہا کیا جائے اور ان کے خلاف قائم مقدمات ختم کیے جائیں۔

ترجمان کے مطابق اگر حکومت مقررہ مدت تک مطالبات تسلیم نہیں کرتی تو کاکروچ جنتا پارٹی دوبارہ ملک گیر احتجاج شروع کرنے پر مجبور ہوگی، جس کی تمام تر ذمہ داری حکومت پر عائد ہوگی۔

واضح رہے کہ کاکروچ جنتا پارٹی نے تین روز قبل وزیر تعلیم دھرمیندر پردھان کے استعفے کے مطالبے پر کئی روز سے جاری اپنا دھرنا ختم کیا تھا۔ تاہم پارٹی کا مؤقف ہے کہ احتجاج کے خاتمے کے بعد بھی کارکنوں کی گرفتاریوں کا سلسلہ جاری ہے، جس کے باعث دوبارہ احتجاج کی تیاری کی جا رہی ہے۔