سرحد پار سے دراندازی کسی صورت برداشت نہیں کی جائے گی، کمانڈر نیشنل اسٹریٹجک کمانڈ

ایبٹ آباد: کمانڈر نیشنل اسٹریٹجک کمانڈ جنرل سید عامر رضا نے کہا ہے کہ پاکستان کی مسلح افواج ملک کے چپے چپے کی حفاظت کے لیے ہمہ وقت تیار ہیں اور سرحد پار سے ہونے والی دراندازی کسی صورت برداشت نہیں کی جائے گی۔

پاکستان ملٹری اکیڈمی (پی ایم اے) کاکول میں پاسنگ آؤٹ پریڈ سے خطاب کرتے ہوئے جنرل سید عامر رضا نے فارغ التحصیل کیڈٹس اور ان کے والدین کو مبارک باد دی۔ انہوں نے کہا کہ کیڈٹس کے کندھوں پر ملک کی سلامتی، وقار اور تحفظ کی بھاری ذمہ داری عائد ہوتی ہے، جسے انہیں پوری دیانت داری اور پیشہ ورانہ صلاحیت کے ساتھ نبھانا ہوگا۔

جنرل سید عامر رضا نے کہا کہ کیڈٹس اپنی پیشہ ورانہ زندگی میں آنے والے چیلنجز کا بہادری اور جرات سے مقابلہ کریں، کیونکہ دیانت داری، بہادری اور جرات کامیاب قیادت کے بنیادی اصول ہیں۔ انہوں نے خواتین کیڈٹس کی شرکت کو باعثِ افتخار قرار دیتے ہوئے کہا کہ افواج پاکستان نے ہر شعبے میں اپنی صلاحیتوں کا لوہا منوایا ہے۔

کمانڈر نیشنل اسٹریٹجک کمانڈ کا کہنا تھا کہ خطے کی حالیہ کشیدہ صورتحال میں پاکستان نے عالمی سطح پر مثبت کردار ادا کیا، جبکہ کشیدگی میں کمی کے لیے پاکستان کی ثالثی کی کوششوں کو دنیا بھر میں دیکھا گیا۔

انہوں نے مزید کہا کہ پاکستان کے بہادر جوان ملکی تحفظ کے لیے اپنی جانوں کا نذرانہ پیش کر رہے ہیں اور افواج پاکستان قومی سلامتی کو یقینی بنانے کے لیے ہر وقت تیار ہیں۔ ان کا کہنا تھا کہ سرحد پار سے کسی بھی قسم کی دراندازی کو برداشت نہیں کیا جائے گا۔

جنرل سید عامر رضا نے فلسطین میں انسانی حقوق کی خلاف ورزیوں کو روکنے کی ضرورت پر زور دیتے ہوئے کہا کہ وہاں انسانی حقوق کی پامالی بند ہونی چاہیے۔ انہوں نے مسئلہ کشمیر کو بھی اقوام متحدہ کی سلامتی کونسل کی قراردادوں کے مطابق حل طلب عالمی معاملہ قرار دیا۔