ڈی جی آئی ایس پی آر کی جامعات کے وائس چانسلرز اور اساتذہ سے خصوصی نشست، قومی سلامتی پر اہم بریفنگ

راولپنڈی میں منعقدہ نیشنل سکیورٹی اینڈ سٹریٹجک لیڈرشپ ورکشاپ 2026 کے دوران ڈی جی آئی ایس پی آر کی جانب سے مختلف جامعات کے وائس چانسلرز، ڈینز، رجسٹرارز اور سینئر اساتذہ کے ساتھ خصوصی نشست کا اہتمام کیا گیا۔

ورکشاپ میں پاکستان بھر کی 200 سے زائد جامعات کے وائس چانسلرز، ڈینز، رجسٹرارز اور سینئر فیکلٹی ممبران نے شرکت کی، جبکہ لاہور، کراچی، پشاور، مظفرآباد، ملتان اور کوئٹہ سے متعدد شرکاء نے آن لائن بھی پروگرام میں حصہ لیا۔

ڈی جی آئی ایس پی آر نے ورکشاپ کے شرکاء سے خطاب کرتے ہوئے ملک کی داخلی صورتحال، قومی سلامتی، سکیورٹی چیلنجز اور انفارمیشن وارفیئر سے متعلق اہم امور پر تفصیلی گفتگو کی۔ اس موقع پر اکیڈیمیا کے کردار، نوجوان نسل کی رہنمائی اور قومی بیانیے کو مضبوط بنانے کی ضرورت پر بھی زور دیا گیا۔

خصوصی نشست میں شریک وائس چانسلرز اور اساتذہ نے پاک فوج کے کردار کو سراہتے ہوئے کہا کہ افواجِ پاکستان نے ملک کے دفاع، استحکام اور سلامتی کے لیے ہمیشہ قابلِ فخر کردار ادا کیا ہے۔ شرکاء کا کہنا تھا کہ “معرکۂ حق” میں پاکستان کو عظیم کامیابی پاک افواج کی پیشہ ورانہ صلاحیتوں کی بدولت حاصل ہوئی اور قوم کو ملکی دفاع کے مضبوط ہاتھوں میں ہونے پر مکمل اعتماد ہے۔

شرکاء نے اس بات کا بھی اظہار کیا کہ آزاد کشمیر سمیت مقبوضہ کشمیر کے عوام بھی پاک فوج پر فخر کرتے ہیں۔ ان کا کہنا تھا کہ طلباء کو منفی پروپیگنڈے سے محفوظ رکھنے اور درست معلومات فراہم کرنے کے حوالے سے اس نشست سے واضح رہنمائی حاصل ہوئی ہے۔

ورکشاپ کے دوران اکیڈیمیا کو قومی سلامتی، انفارمیشن وارفیئر اور ملک کو درپیش چیلنجز کے حوالے سے جامع آگہی فراہم کی گئی۔ شرکاء کے مطابق افواجِ پاکستان اور تعلیمی اداروں کے درمیان مضبوط رابطہ وقت کی اہم ضرورت ہے تاکہ نوجوان نسل کو قومی معاملات سے مؤثر انداز میں آگاہ رکھا جا سکے۔

ورکشاپ کے شرکاء نے وائس چانسلرز اور اکیڈیمیا کو ایک پلیٹ فارم پر اکٹھا کرنے کے آئی ایس پی آر کے اقدام کو سراہتے ہوئے اسے قومی یکجہتی اور مؤثر ابلاغ کی جانب اہم پیش رفت قرار دیا۔