ایران سے مذاکرات جاری، انجام کوئی نہیں جانتا: صدر ٹرمپ

(واشنگٹن) امریکی صدر ڈونلڈ ٹرمپ نے کہا ہے کہ ایران کے ساتھ مذاکرات اور رابطوں کا سلسلہ بدستور جاری ہے، تاہم اس وقت کوئی بھی یہ نہیں جانتا کہ ان بات چیت کا حتمی نتیجہ کیا نکلے گا۔

سوشل میڈیا پلیٹ فارم "ٹروتھ سوشل" پر جاری اپنے بیان میں صدر ٹرمپ نے ان خبروں کو مسترد کر دیا جن میں دعویٰ کیا گیا تھا کہ امریکا اور ایران نے چند روز قبل ایک دوسرے کے ساتھ مذاکرات بند کر دیے ہیں۔

انہوں نے کہا کہ دونوں ممالک کے درمیان رابطے مسلسل برقرار ہیں اور آج بھی بات چیت ہوئی ہے۔ ٹرمپ کے مطابق مذاکرات کے نتائج کے بارے میں فی الحال کوئی حتمی پیش گوئی نہیں کی جا سکتی، تاہم ایران کو واضح پیغام دے دیا گیا ہے کہ اب وقت آ گیا ہے کہ کسی نہ کسی صورت میں ایک معاہدہ طے کیا جائے۔

امریکی صدر نے مزید کہا کہ ایران گزشتہ 47 برس سے اسی انداز میں معاملات چلا رہا ہے اور اب یہ صورتحال مزید برقرار نہیں رہ سکتی۔

دوسری جانب امریکا اور ایران کے درمیان جنگ بندی برقرار ہے، جبکہ پاکستان دونوں ممالک کے درمیان کشیدگی کم کرنے اور کسی ممکنہ معاہدے کی راہ ہموار کرنے کے لیے اپنی سفارتی کوششیں جاری رکھے ہوئے ہے۔

سیاسی اور سفارتی حلقوں کے مطابق امریکا اور ایران کے درمیان جاری مذاکرات خطے کے امن و استحکام کے لیے انتہائی اہمیت رکھتے ہیں اور کسی بھی ممکنہ پیش رفت کے عالمی سیاست پر دور رس اثرات مرتب ہو سکتے ہیں۔