ٹرمپ کی قومی سلامتی ٹیم سے اہم ملاقات، ایران سے متعلق آپشنز پر غور

(واشنگٹن) امریکی صدر ڈونلڈ ٹرمپ نے قومی سلامتی ٹیم کے ساتھ ایک اہم اجلاس میں ایران کے خلاف ممکنہ اقدامات اور خطے کی صورتحال پر تفصیلی غور کیا ہے۔

امریکی نشریاتی ادارے سی این این کے مطابق اجلاس میں نائب صدر، وزیر خارجہ، سی آئی اے ڈائریکٹر اور دیگر اعلیٰ حکام شریک ہوئے، جہاں ایران جنگ سے متعلق آئندہ کے لائحہ عمل پر تبادلہ خیال کیا گیا۔

رپورٹ کے مطابق صدر ٹرمپ نے یہ ملاقات ورجینیا میں قائم اپنے گالف کلب میں دورۂ چین سے واپسی کے بعد کی، جبکہ ذرائع کا کہنا ہے کہ رواں ہفتے قومی سلامتی ٹیم کا ایک اور اہم اجلاس بھی متوقع ہے۔

ذرائع کے مطابق اگر ایران کے خلاف عسکری کارروائی کا فیصلہ کیا گیا تو پینٹاگون نے مختلف فوجی منصوبے پہلے ہی تیار کر رکھے ہیں۔ ان منصوبوں میں ایران کے توانائی اور بنیادی ڈھانچے پر محدود حملوں کے آپشنز بھی شامل ہیں۔

امریکی حکام کے مطابق مشرق وسطیٰ میں بڑھتی ہوئی کشیدگی اور ایران کی سرگرمیوں کے تناظر میں مختلف سفارتی اور عسکری امکانات کا جائزہ لیا جا رہا ہے۔

سیاسی مبصرین کے مطابق ٹرمپ انتظامیہ خطے میں طاقت کے توازن، عالمی توانائی کی صورتحال اور اتحادی ممالک کے ردعمل کو مدنظر رکھتے ہوئے محتاط حکمت عملی اختیار کر رہی ہے۔