آبنائے ہرمز میں بحری آمدورفت بحال، ٹرمپ کا اعلان، تیل بردار جہاز دوبارہ روانہ

امریکی صدر ڈونلڈ ٹرمپ نے اعلان کیا ہے کہ آبنائے ہرمز میں بحری جہازوں کی نقل و حرکت دوبارہ شروع ہو گئی ہے اور متعدد تیل بردار جہاز اپنی منزلوں کی جانب روانہ ہو چکے ہیں، جس سے عالمی توانائی منڈیوں میں استحکام کی امید پیدا ہوئی ہے۔

صدر ٹرمپ نے اپنے سوشل میڈیا پلیٹ فارم پر جاری بیان میں کہا کہ بحری جہاز آبنائے ہرمز کے جنوبی بحری راستے سے گزر رہے ہیں، جو اس وقت مکمل طور پر محفوظ، مستحکم اور پرامن ہے۔ ان کے مطابق جنوبی راستے کے علاوہ بھی متبادل بحری گزرگاہیں موجود ہیں جنہیں ضرورت پڑنے پر استعمال کیا جا سکتا ہے۔

یہ پیش رفت ایسے وقت میں سامنے آئی ہے جب امریکا اور ایران کے درمیان ایک مفاہمتی یادداشت پر اتفاق ہو چکا ہے، جس کے بعد آبنائے ہرمز کو مرحلہ وار مکمل طور پر بحال کرنے کا عمل شروع کر دیا گیا ہے۔

واضح رہے کہ حالیہ کشیدگی کے دوران آبنائے ہرمز میں جہاز رانی اور تیل کی ترسیل سے متعلق خدشات کے باعث عالمی منڈیوں میں بے یقینی پیدا ہو گئی تھی، کیونکہ دنیا کی بڑی مقدار میں خام تیل اسی اہم بحری گزرگاہ سے گزرتا ہے۔

دوسری جانب وزیراعظم شہباز شریف نے کہا تھا کہ امریکا اور ایران کے درمیان مجوزہ معاہدے کی باضابطہ تقریب 19 جون کو جنیوا میں منعقد ہوگی، جس کی میزبانی پاکستان کرے گا۔ مبصرین کے مطابق اس معاہدے سے نہ صرف خطے میں کشیدگی میں کمی آئے گی بلکہ عالمی توانائی کی سپلائی چین بھی مزید مستحکم ہوگی۔