ٹرمپ نے آبنائے ہرمز کی امریکی ناکہ بندی ختم کر دی، ایرانی نیوکلیئر مواد نکالنے کا اعلان

واشنگٹن: امریکی صدر ڈونلڈ ٹرمپ نے آبنائے ہرمز کی امریکی ناکہ بندی ختم کرنے کا اعلان کرتے ہوئے کہا ہے کہ ایران کو اس بات پر متفق ہونا ہوگا کہ وہ کبھی جوہری ہتھیار یا ایٹم بم حاصل نہیں کرے گا۔

اپنے بیان میں ڈونلڈ ٹرمپ نے کہا کہ آبنائے ہرمز میں امریکی ناکہ بندی کے باعث رُکے ہوئے جہازوں کو اب گزرنے کی اجازت دے دی گئی ہے۔ انہوں نے کہا کہ خطے میں کشیدگی کم کرنے اور عالمی تجارتی راستوں کو بحال رکھنے کے لیے یہ فیصلہ کیا گیا۔

امریکی صدر نے دعویٰ کیا کہ ایرانی نیوکلیئر مواد تقریباً مکمل طور پر تباہ ہو چکا ہے اور یہ مواد منہدم پہاڑوں کے نیچے گہرائی میں دفن ہے۔ ٹرمپ کے مطابق افزودہ یورینیم کی یہ تباہی 11 ماہ قبل امریکی بی ٹو بمبار طیاروں کے حملے کے نتیجے میں ہوئی تھی۔

ڈونلڈ ٹرمپ نے کہا کہ امریکا اور چین کے پاس ایسی جدید تکنیکی صلاحیت موجود ہے جس کے ذریعے زمین میں دفن ایرانی نیوکلیئر مواد کو نکالا جا سکتا ہے۔ انہوں نے مزید کہا کہ یہ عمل ایران اور عالمی ایٹمی توانائی ایجنسی کے تعاون سے مکمل کیا جائے گا۔

امریکی صدر کے مطابق نکالے گئے نیوکلیئر مواد کو دوبارہ تباہ کیا جائے گا تاکہ مستقبل میں ایران کے جوہری پروگرام کو مکمل طور پر غیر مؤثر بنایا جا سکے۔

ٹرمپ نے مزید کہا کہ وہ صورتحال کا جائزہ لینے اور حتمی فیصلے کے لیے سیچوایشن روم میں اہم اجلاس کر رہے ہیں، جہاں امریکی قومی سلامتی کے اعلیٰ حکام بھی موجود ہوں گے۔

دوسری جانب عالمی سطح پر ٹرمپ کے اس بیان کے بعد خطے میں نئی بحث چھڑ گئی ہے، جبکہ ماہرین اس اعلان کو مشرق وسطیٰ کی بدلتی صورتحال میں اہم پیش رفت قرار دے رہے ہیں۔