خیبرپختونخوا میں سیکیورٹی صورتحال کے پیش نظر تعلیمی ادارے بند، میٹرک کے امتحانات ملتوی

ویب ڈیسک: خیبرپختونخوا کے مختلف اضلاع میں سیکیورٹی صورتحال کے پیش نظر تعلیمی ادارے بند رکھنے کا اعلان کر دیا گیا ہے، جبکہ میٹرک کے امتحانات بھی ملتوی کر دیے گئے ہیں۔

تفصیلات کے مطابق ضلع پشاور کے تمام سرکاری اور نجی تعلیمی ادارے آج بند رہیں گے۔ اسی طرح جنوبی وزیرستان اور لوئر دیر میں بھی آج تمام تعلیمی ادارے بند رکھنے کا فیصلہ کیا گیا ہے۔

سرکاری ذرائع کے مطابق بنوں تعلیمی بورڈ کے تحت میٹرک سالانہ امتحانات دوم کے تمام پرچے ملتوی کر دیے گئے ہیں۔ آج ہونے والا پرچہ بھی تاحکم ثانی ملتوی کر دیا گیا ہے، جبکہ امتحانات کی نئی تاریخوں کا اعلان بعد میں کیا جائے گا۔

دوسری جانب کوہاٹ میں بھی امتحانات ملتوی کر دیے گئے ہیں۔ تاہم، ملتوی ہونے والے امتحانات کی نئی تاریخوں سے متعلق مزید تفصیلات سامنے نہیں آئی ہیں۔

ادھر ضلع مالاکنڈ میں تعلیمی ادارے آج اور کل بند رکھنے کا فیصلہ کیا گیا ہے۔ اس کے علاوہ ضلع بھر میں 30 روز کے لیے دفعہ 144 بھی نافذ کر دی گئی ہے۔

حکام کے ان اقدامات کا مقصد موجودہ سیکیورٹی صورتحال کے پیش نظر احتیاطی تدابیر اختیار کرنا ہے۔ طلبہ اور والدین کو ہدایت کی جاتی ہے کہ وہ امتحانات کی نئی تاریخوں اور تعلیمی اداروں کی دوبارہ کھلنے سے متعلق سرکاری اعلانات پر نظر رکھیں۔