کوئٹہ: چمن پھاٹک کے قریب دھماکے میں 10 افراد زخمی، تحقیقات شروع

کوئٹہ کے علاقے چمن پھاٹک کے قریب زور دار دھماکے کے نتیجے میں کم از کم 10 افراد زخمی ہو گئے۔پولیس حکام کے مطابق دھماکا اچانک ہوا جس کے بعد علاقے میں خوف و ہراس پھیل گیا۔ واقعے کی اطلاع ملتے ہی امدادی ٹیمیں اور قانون نافذ کرنے والے ادارے فوری طور پر موقع پر پہنچ گئے۔

زخمیوں کو ابتدائی طبی امداد فراہم کرنے کے بعد قریبی اسپتال منتقل کر دیا گیا، جہاں بعض زخمیوں کی حالت تشویشناک بتائی جا رہی ہے۔

پولیس کا کہنا ہے کہ سیکیورٹی فورسز نے دھماکے کے مقام اور اطراف کے علاقوں کو گھیرے میں لے لیا ہے جبکہ دھماکے کی نوعیت اور اس کے محرکات جاننے کے لیے تحقیقات کا آغاز کر دیا گیا ہے۔

حکام کے مطابق شواہد اکٹھے کیے جا رہے ہیں اور مزید معلومات تحقیقات مکمل ہونے کے بعد سامنے آئیں گی۔