دہشت گردی کے خلاف جنگ پوری قومی قوت کے ساتھ جاری رہے گی: فیلڈ مارشل عاصم منیر

راولپنڈی پاک فوج کے شعبہ تعلقات عامہ کے مطابق جنرل ہیڈکوارٹرز راولپنڈی میں پاک فوج کے افسران اور جوانوں کو عسکری اعزازات دینے کی ایک پروقار تقریبِ تقسیمِ اسناد منعقد ہوئی، جس میں فیلڈ مارشل سید عاصم منیر نے بطور مہمانِ خصوصی شرکت کی۔

تقریب کے دوران شہداء کے اہلِ خانہ، افسران اور جوانوں کو آپریشنز میں غیر معمولی بہادری اور وطن کیلئے نمایاں خدمات کے اعتراف میں اعزازات سے نوازا گیا۔ اس موقع پر 50 ستارۂ امتیاز (ملٹری) جبکہ 12 تمغۂ بسالت عطا کیے گئے۔ بعد از شہادت دیے جانے والے اعزازات شہداء کے اہلِ خانہ نے وقار اور عزت کے ساتھ وصول کیے۔

فیلڈ مارشل سید عاصم منیر نے شہداء اور غازیوں کو خراجِ عقیدت پیش کرتے ہوئے کہا کہ شہداء اور غازی قوم کا دائمی فخر ہیں اور ان کی قربانیاں ہر پاکستانی کیلئے ایک مقدس امانت کی حیثیت رکھتی ہیں۔ انہوں نے کہا کہ وطن کا امن اور سلامتی انہی عظیم قربانیوں اور فرض سے بے لوث وابستگی کا نتیجہ ہے۔

انہوں نے شہداء کے اہلِ خانہ کی استقامت، حوصلے اور وطن سے غیر متزلزل وابستگی کو بھی زبردست خراجِ تحسین پیش کیا۔

چیف آف ڈیفنس فورسز نے پاک فوج اور قانون نافذ کرنے والے اداروں کی عملی تیاری اور عزم کو سراہتے ہوئے دہشت گردوں کے خلاف جاری کارروائیوں کی تعریف کی اور اس عزم کا اعادہ کیا کہ دہشت گردی کے مکمل خاتمے تک جنگ پوری قومی قوت کے ساتھ جاری رکھی جائے گی۔