فیلڈ مارشل عاصم منیر کا اہم دورۂ ایران مکمل، خطے میں مفاہمت کی جانب پیش رفت

پاک فوج کے شعبۂ تعلقات عامہ آئی ایس پی آر کے مطابق کا مختصر مگر انتہائی اہم سرکاری دورۂ ایران مکمل ہو گیا، جہاں گزشتہ 24 گھنٹوں کے دوران ہونے والی گہری بات چیت کے نتیجے میں حتمی مفاہمت کی جانب حوصلہ افزا پیش رفت سامنے آئی ہے

آئی ایس پی آر کے مطابق ایران پہنچنے پر فیلڈ مارشل عاصم منیر کا استقبال ایرانی وزیر داخلہ اسکندر مومنی نے سینئر سول اور عسکری حکام کے ہمراہ کیا۔

دورے کے دوران فیلڈ مارشل نے ایران کی اعلیٰ قیادت سے اہم ملاقاتیں کیں جن میں خطے میں کشیدگی میں کمی، امن کے قیام اور جاری ثالثی کوششوں پر تفصیلی تبادلہ خیال کیا گیا۔ یہ ملاقاتیں جاری سفارتی و ثالثی عمل کا حصہ تھیں۔

آئی ایس پی آر کے مطابق فیلڈ مارشل عاصم منیر نے ایرانی صدر مسعود پزشکیان سے ملاقات کی، جبکہ ایرانی پارلیمنٹ کے اسپیکر باقر قالیباف اور وزیر خارجہ عباس عراقچی سے بھی اہم ملاقاتیں ہوئیں۔

بیان کے مطابق تہران میں ہونے والی ملاقاتیں مثبت اور تعمیری ماحول میں انجام پائیں، جنہوں نے ثالثی کے عمل کو مؤثر انداز میں آگے بڑھانے میں اہم کردار ادا کیا۔ گزشتہ 24 گھنٹوں کے دوران ہونے والی گہری بات چیت کے نتیجے میں حتمی مفاہمت کی طرف حوصلہ افزا پیش رفت سامنے آئی ہے۔

آئی ایس پی آر کا کہنا ہے کہ ملاقاتوں کا مقصد 8 اپریل کی جنگ بندی کے بعد خطے میں پیدا ہونے والی کشیدگی میں کمی اور تعمیری روابط کے فروغ کو یقینی بنانا تھا۔

ایرانی قیادت نے علاقائی مسائل کے پرامن حل اور مذاکرات کے فروغ میں پاکستان کے مخلصانہ اور تعمیری کردار کو سراہتے ہوئے امن کے لیے اسلام آباد کی سفارتی کوششوں کی تعریف کی۔