تہران سے بین الاقوامی پروازیں بحال، امام خمینی ایئرپورٹ سے فلائٹس دوبارہ شروع

(تہران) ایران کے دارالحکومت تہران سے بین الاقوامی پروازوں کا سلسلہ دوبارہ بحال کر دیا گیا ہے۔

ایرانی میڈیا کے مطابق امام خمینی ایئرپورٹ سے بین الاقوامی فلائٹ آپریشن دوبارہ شروع ہو گیا ہے، جس کے تحت مدینہ، مسقط اور استنبول کیلئے پروازیں روانہ ہو چکی ہیں۔

ایرانی حکام کا کہنا ہے کہ آئندہ دنوں میں فلائٹ آپریشن کو مزید تیز کیا جائے گا تاکہ مسافروں کو سہولت فراہم کی جا سکے اور بین الاقوامی سفری سرگرمیاں معمول پر لائی جا سکیں۔

حکام کے مطابق پروازوں کی بحالی خطے کی صورتحال میں بہتری اور فضائی آپریشنز کی مرحلہ وار بحالی کا حصہ ہے۔

بین الاقوامی پروازوں کی بحالی کو ایران کیلئے ایک اہم پیش رفت قرار دیا جا رہا ہے، خاص طور پر ایسے وقت میں جب خطے میں کشیدگی اور سفری پابندیوں کے باعث فضائی سرگرمیاں متاثر ہوئی تھیں۔