یوکرین میں توانائی کا بحران شدت اختیار کرگیا، لاکھوں گھر بجلی سے محروم، زیلنسکی کا اعتراف

یوکرین میں توانائی کے بنیادی ڈھانچے پر حملوں کے باعث بجلی کی فراہمی شدید متاثر ہوگئی، جبکہ لاکھوں گھرانے بجلی سے محروم ہیں۔

یوکرینی صدر ولادیمیر زیلنسکی نے اپنے ٹیلی گرام بیان میں کہا ہے کہ کیف، دنیپروپیٹروفسک اور خارکوف میں تھرمل پاور پلانٹس کو حملوں کا نشانہ بنایا گیا، جبکہ دنیپروپیٹروفسک کے علاقے میں بجلی کے چار سب اسٹیشنز بھی متاثر ہوئے ہیں۔

زیلنسکی کے مطابق دنیپروپیٹروفسک شہر اور گردونواح میں تقریباً دو لاکھ گھرانے بجلی سے محروم ہیں، جبکہ کیف کے علاقے میں 80 ہزار سے زائد گھرانوں کو بجلی کی فراہمی معطل ہے۔

دوسری جانب روسی وزارت دفاع نے دعویٰ کیا ہے کہ روسی افواج نے یوکرین کے توانائی اور لاجسٹک انفراسٹرکچر کی ان تنصیبات کو نشانہ بنایا جو روس کے مطابق یوکرین کے فوجی صنعتی کمپلیکس کے لیے استعمال ہو رہی تھیں۔