جی سیون ممالک کا ایران امریکا معاہدے کا خیرمقدم، مؤثر عملدرآمد کیلئے تعاون کا اعلان

(اوٹاوا) جی سیون ممالک نے ایران اور امریکا کے درمیان طے پانے والے معاہدے کا خیرمقدم کرتے ہوئے اس کی مکمل حمایت کا اعلان کیا ہے اور کہا ہے کہ معاہدے پر مؤثر عملدرآمد کے لیے اپنا کردار ادا کرنے کو تیار ہیں۔

خبر ایجنسی کے مطابق جی سیون ممالک کی جانب سے جاری مشترکہ بیان میں کہا گیا ہے کہ ایران اور امریکا کے درمیان ہونے والا معاہدہ خطے میں استحکام اور کشیدگی میں کمی کی جانب ایک اہم پیش رفت ہے۔

مشترکہ اعلامیے میں کہا گیا کہ بین الاقوامی سمندری گزرگاہوں میں بلا رکاوٹ اور بغیر کسی اضافی پابندی یا ٹول کے آمدورفت عالمی تجارت اور اقتصادی استحکام کی بنیادی ضرورت ہے، جس کا تحفظ عالمی برادری کی مشترکہ ذمہ داری ہے۔

جی سیون ممالک نے لبنان کی صورتحال پر بھی تشویش کا اظہار کرتے ہوئے فوری اور پائیدار جنگ بندی کی حمایت کی۔ اعلامیے میں لبنانی قیادت کی جانب سے حزب اللہ کو غیر مسلح کرنے اور ریاستی اداروں کی عملداری مضبوط بنانے کی کوششوں کی بھی تائید کی گئی۔

بیان میں مزید کہا گیا کہ عالمی توانائی منڈیوں کے استحکام کے لیے آبنائے ہرمز پر انحصار کم کرنے کی ضرورت ہے۔ اس مقصد کے لیے رکن ممالک نے توانائی کے اسٹریٹجک ذخائر میں اضافے اور متبادل سپلائی ذرائع کو فروغ دینے کے عزم کا اظہار کیا۔

تجزیہ کاروں کے مطابق جی سیون کا یہ مشترکہ مؤقف نہ صرف ایران امریکا معاہدے کے لیے بین الاقوامی حمایت کا اظہار ہے بلکہ مشرق وسطیٰ میں امن، عالمی تجارت کے تحفظ اور توانائی کے استحکام کے حوالے سے بھی اہم پیغام سمجھا جا رہا ہے۔