پاکستان میں سونے اور چاندی کی قیمتوں میں کمی، فی تولہ سونا ایک ہزار روپے سستا

کراچی: عالمی اور مقامی مارکیٹ میں سونے اور چاندی کی قیمتوں میں کمی ریکارڈ کی گئی ہے، جس کے بعد پاکستان میں فی تولہ سونا ایک ہزار روپے سستا ہو گیا۔

آل پاکستان صرافہ جیمز اینڈ جیولرز ایسوسی ایشن کے مطابق 24 قیراط فی تولہ سونے کی قیمت 1,000 روپے کمی کے بعد 4 لاکھ 31 ہزار 236 روپے ہو گئی ہے۔

اسی طرح 10 گرام 24 قیراط سونے کی قیمت 730 روپے کم ہو کر 3 لاکھ 69 ہزار 715 روپے تک آ گئی ہے۔

چاندی کی قیمت میں بھی نمایاں کمی دیکھنے میں آئی۔ ایسوسی ایشن کے مطابق 24 قیراط فی تولہ چاندی کی قیمت 271 روپے کمی کے بعد 6 ہزار 393 روپے فی تولہ ہو گئی ہے۔

دوسری جانب بین الاقوامی مارکیٹ میں بھی سونے کی قیمت میں کمی ریکارڈ کی گئی، جہاں فی اونس سونا 10 ڈالر سستا ہو کر 4 ہزار 88 ڈالر کی سطح پر آ گیا۔

ماہرین کے مطابق عالمی سطح پر قیمتی دھاتوں کی قیمتوں میں اتار چڑھاؤ، ڈالر کی قدر، مرکزی بینکوں کی پالیسیوں اور عالمی معاشی صورتحال سونے اور چاندی کی قیمتوں پر براہ راست اثر انداز ہوتی ہے۔ اگر عالمی مارکیٹ میں یہی رجحان برقرار رہا تو مقامی مارکیٹ میں بھی قیمتوں میں مزید ردوبدل کا امکان موجود ہے۔