سونے اور چاندی کی قیمتوں میں بڑی کمی، پاکستان میں فی تولہ سونا 5 لاکھ سے نیچے آ گیا

(اسلام آباد) عالمی اور مقامی گولڈ مارکیٹس میں سونے اور چاندی کی قیمتوں میں نمایاں کمی ریکارڈ کی گئی ہے، جس کے باعث سرمایہ کاروں میں تشویش کی لہر دیکھی جا رہی ہے۔

مارکیٹ ذرائع کے مطابق بین الاقوامی سطح پر فی اونس سونے کی قیمت میں 52 ڈالر کی کمی ہوئی ہے جس کے بعد قیمت کم ہو کر 4714 ڈالر پر آ گئی ہے۔ سونے کی قیمت میں یہ مسلسل چوتھے روز کمی ہے، جس کی بڑی وجہ عالمی سطح پر جاری کشیدگی کے باوجود مذاکرات میں پیش رفت نہ ہونا بتائی جا رہی ہے۔

پاکستان میں بھی سونے کی قیمتوں میں نمایاں کمی دیکھی گئی ہے، جہاں 24 قیراط فی تولہ سونا 5200 روپے سستا ہو کر 493,762 روپے پر آ گیا، یوں فی تولہ سونا 5 لاکھ روپے کی سطح سے نیچے آ گیا ہے۔

اسی طرح 10 گرام سونے کی قیمت میں 4458 روپے کی کمی ریکارڈ کی گئی، جس کے بعد نئی قیمت 423,321 روپے ہو گئی ہے۔

دوسری جانب چاندی کی قیمت میں بھی کمی دیکھنے میں آئی ہے، جہاں فی تولہ چاندی 225 روپے سستی ہو کر 8099 روپے پر آ گئی ہے۔

ماہرین کے مطابق عالمی مارکیٹ میں غیر یقینی صورتحال اور سرمایہ کاروں کی جانب سے محتاط رویے کے باعث قیمتی دھاتوں کی قیمتوں میں اتار چڑھاؤ جاری رہ سکتا ہے۔