سرکاری پیٹرول ریلیف اسکیم: 100 روپے فی لیٹر سبسڈی حاصل کرنے کا طریقہ بتادیا

اسلام آباد: حکومت نے پیٹرول پر 100 روپے فی لیٹر ریلیف حاصل کرنے کے طریقہ کار کی تفصیلات جاری کردی ہیں۔ وفاقی وزیرِ آئی ٹی شزا فاطمہ نے بتایا کہ حکومتی اسکیم کے تحت 2 ویلر، 3 ویلر اور 800 سی سی تک کی گاڑیوں کے مالکان کو پیٹرول پر سبسڈی دی جائے گی۔

اسلام آباد میں وفاقی وزرا عطا تارڑ اور علی پرویز ملک کے ہمراہ پریس کانفرنس کرتے ہوئے شزا فاطمہ نے کہا کہ 2 اور 3 ویلر گاڑیوں کے لیے 20 لیٹر جبکہ 800 سی سی تک کی گاڑیوں کے لیے 30 لیٹر پیٹرول پر ریلیف فراہم کیا جائے گا۔

انہوں نے بتایا کہ ریلیف پروگرام دو مراحل پر مشتمل ہے۔ پہلے مرحلے میں رجسٹریشن ضروری ہوگی، جس کے لیے صارف اپنے شناختی کارڈ پر رجسٹرڈ موبائل سم سے REG، شناختی کارڈ نمبر، صوبے کا پہلا حرف اور بائیک یا گاڑی کی رجسٹریشن کی تاریخ لکھ کر 9771 پر ایس ایم ایس کرے گا۔

رجسٹریشن کے بعد پیٹرول خریدتے وقت صارف کو 9771 پر TOK لکھ کر پیغام بھیجنا ہوگا۔ موصول ہونے والا ٹوکن پیٹرول پمپ پر دکھانے کے بعد سبسڈی حاصل کی جاسکے گی۔

وزیر آئی ٹی نے شہریوں کو خبردار کیا کہ وہ اپنا شناختی کارڈ نمبر یا دیگر ذاتی معلومات کسی کے ساتھ شیئر نہ کریں۔ حکومت شہریوں سے نہ اضافی ڈیٹا طلب کرے گی اور نہ ہی کسی قسم کے چارجز وصول کرے گی۔

حکومت کے مطابق اسلام آباد کے شہری 14 اور 15 ستمبر کی درمیانی شب 12 بجے سے جبکہ ملک بھر، آزاد کشمیر اور گلگت بلتستان کے شہری 16 اور 17 ستمبر کی درمیانی شب 12 بجے سے پیٹرول ریلیف سے فائدہ اٹھا سکیں گے۔